ni Alfonso T. Ruda
DIPOLOG CITY, APR. 11(PIA)---Subling gihatagan ug punto sa Malakanyang ang sinseridad sa kagamhanang-Aquino nga mapangitaan ug solusyon ang problema sa enerhiya sa Mindanao pinaagi sa pagpahigayon ug Energy Summit karong Biyernes didto sa dakbayan sa Davao diin makipagdiyalogo si Presidente Benigno Aquino III sa mga dagkong opisyal ug power industry stakeholders dinhi sa habagatang bahin sa nasod.
Sa regular media briefing sa Malakanyang kagahapon, gipanghimakak ni Presidential spokesperson Edwin Lacierda ang taho nga ang pagahimoong summit usa lang ka moro-moro diin ang ipasar nga kasabutan na-andam nang daan wa pa man ipahigayon ang maong kalihokan.
Matod pa usab ni Lacierda, nga ang miting uban sa mga stakeholders, gi-organisa sa Mindanao Development Authority (MDA) nga gipanguluhan ni Secretary Luwalhati Antonino.
“Ang Energy Summit dili pinasiugdahan sa Department of Energy sumala sa aunang migawas nga balita. Ang Mindanao Development Authority mao ang nag-unang ahensiya sa gobyerno uban kang Sec. Antonino,” matod pa ni Lacierda.
“Dili tinuod nga moro-moro lang ni kay dihay gipahigayong pre-energy summit niadtong miaging semana…. Ang mga tawo sa Mindanao nangandam alang niining maong summit…. Nay pipila ka mga stakeholders sa Mindanao, sama sa generators, transmission distributors, electric cooperatives, mga konsumante, mga kagamhanang-lokal, busa kinahanglang makakab-ot kita ug consensus kon unsaon pagtubag kining problema sa enerhiya sa Mindanao,” midugang pa si Lacierda.
Matod pa usab niya, sa pagahimoong summit, disisyonan sa taga-Mindanao kon unsay angay nga buhaton aron masulbad ang problema sa enerhiya dinhi sa rehiyon.
“Duna nay gisugyot nga solusyon, butang nga ilang disidihan…. Samtang si Presidente Aquino, sa kanunay miingon nga ang tanan kinahanglang anaa lang sa usa ka pahina kon solusyon na sa problema sa enerhiya sa Mindanao ang hisgutan,” nagkanayon si Lacierda.(ATR/PCOO/PIA9-Zambo Norte)
