ni Alfonso T. Ruda
DIPOLOG CITY, APR. 15(PIA)---Gipahayag sa Malakanyang nga tipik na sa long-term plan sa administrasyong Aquino ang pagbalhin ngadto sa renewable energy sources aron masulbad ang problema sa enerhiya sa nasod, partikularmente dinhi sa Mindanao.
Sa usa ka pakighinabi sa radyo, gipahayag ni Deputy Presidential spokesperson Abigail Valte nga samtang gilantaw sa gobyerno ang pagsagop sa renewable energy nga mahimong moabot kini sa mas mahal nga bayronon ug magdulot ug dakong epekto sa bayronon sa kuryente sa mga konsumante.
Pipila sa mga kritiko sa gobyerno ang nanawagan sa gobyerno paggamit sa renewable energy isip hinanaling solusyon sa problema sa enerhiya sa Mindanao.
“Sama sa giingon ni Presidente Benigno Aquino III niadtong miaging adlaw sa Energy Summit, ang tanan gusto ug renewable energy. Mahal lang kini ug daghan pa kitang gilantaw nga solusyon sa problema sa enerhiya,” matod pa ni Valte.
“Tipik lang kana sa malungtarong plano nga naglakip sa daghang proyekto nga naglambigit ug renewable energy. Hinumdomi nga ang Department of Energy nagsugyot usab ug alternatibo ug renewable source energy. Busa tipik na kana sa plano.”
Matod pa ni Valte, gipadali na usab karon sa gobyerno ang pagpa-ayo sa hydro-power plants sa Mindanao, partikularmente ang Agus ug Pulangi plants.
“Kining maong mga planta gidisenyo aron moserbisyo lamang sulod sa 30 ka tuig apan ato kining gigamit sulod sa 59 ka tuig nga halos doble sa tukmang gidugayon paggamit niini. Ang rehabilitasyon sa Agus plant molungtad ug 30 ka bulan samtang ang pagpaayo sa Pulangi molungtad lamang ug 1 ka bulan,” matod pa ni Valte
“Ang pag-usab-usab sa klima naka-apektar sa power generation dinhi sa Mindanao sanglit ang rehiyon nakasinati man ug abnormal nga dagan sa pag-ulan. Ang katunga sa panginahanglan sa enerhiya sa Mindanao, nagagikan sa hydro-power plants.”
“Tungod sa pag-usab-usab sa klima, dili na pareho ang dagan sa pag-ulan kaniadto ug karon. Busa kon moubos ang gidaghanon sa tubig nga mahulog dinhi sa Mindanao, mas mogamay usab ang nagamit niini sa mga hydro-power plants,” patin-aw pa ni Valte.
Isip tubag, gipahayag pa sa opisyal nga nangita karon ug lain ;ang tinubdan sa enerhiya ang gobyerno. Sumala pa sa opisyal duna nay planta nga maglihok sa 2014 ug maoy maghatag ug kuryente sa Mindanao. Hinuon, gipahayag pa niini nga ang solusyon sa problema dili makab-ot sulod sa usa ka gabii lamang.
Ang papgpabarog ug planta nagkinahanglan ug igu-igong panahon ug kinahanglang sundon usab sa mga investors ang mga rekisitos ug gabayan nga itakda sa gobnyerno sa di-pa sila hatagan ug pagtugot nga maka-operate. Ang ubang mga proyekto abtan pa gani ug 1 ka tuig pagproseso sa permit ug mga dokumento para makasugod sa konstruksyon.
Naglaum si Valte nga ang Energy Summit sa dakbayan sa Davao nga gitambungan ni Presidente Aquino magbunga ug positibong resulta sanglit napahimutang man sa gobyerno ug sa mga hingtungdan ang ilang tag-tagsa ka mga sugyot alang sa kasulbaran sa problema sa enerhiya sa Miondanao.
Nanawagan usab si Valte sa katawhan nga dili magsabwag di-tukmang impormasyon ilabi na ang pag-ingon nga mosulbong ang bayronon sa kuryente bisan pa man sa mga pagpaningkamot nga mahatagan kini ug paagi. “Ang ilang gihimo dili makatabang sa sitwasyon,” matod pa ni Valte.(ATR/PCOO/PIA9-Zambo Norte)
