Ni Alma L. Tingcang
| MANILA, April 4 - - - Si Presidente Benigno S. Aquino III miduyog sa ubang mga pangulo sa Association of Southeast Asian Nations (ASEAN) sa pakigbugno niini batok sa illegal nga droga ug nagkasinabot aron mawagtang ang maong problema sa tuig 2015. Sa iyang mensahe atol sa Plenary Session sa 20th Asean Summit didto sa Phnom Penh, Cambodia, mipahayag ang presidente sa iyang suporta ngadto sa Asean, ingon man sa international community diha sa pakigbatok niini sa pag-abuso sa droga. “Among gihingusgan ang suporta sa tanang paningkamot batok sa produksiyon, distribusyon, trafficking ug smuggling sa mga droga nga maoy hulga sa maayong panglawas ug kaayohan sa atong katawhan,” siya miingon sa maong sesyon. “Ang Pilipinas nagtuo nga ang malambuong kooperasyon sa rehiyon ug pagbinayloay sa impormasyon, drug profiling ug ang paghatag ug capacity building programs dinha sa law enforcement, tungod kay ang imbestigasyon sa mga kaso kalabot sa drugs kritikal kaayo aron maangkon ang usa ka drug-free Asean sa 2015.” Matod pa sa presidente nga naglaom siya nga ang maong pamahayag alang sa usa ka drug-free Asean mas mopalambo pa sa kooperasyon tali sa mga miyembro nga nasod. “Tanan kini mahinungdanon aron makab-ot ang usa ka drug-free Asean sa 2015,” matod pa niya. Kaubang nakigduyog sa pagbatok sa illegal nga droga mao ang mga pangulo sa Cambodia, Brunei, Laos, Vietnam, Malaysia, Singapore ug Thailand. Gawas pagtambong sa Asean Summit, gitakda usab ang presidente nga makigdiyalogo sa iyang mga counterparts sa 8th Brunei-Indonesia-Malaysia-Philippines East-Asia Growth Area (BIMP-EAGA) Summit. Makigtagbo usab siya sa Filipino community didto sa Cambodia sa dili pa siya molarga balik sa Manila sa Miyerkoles. (ALT/PIA9-Zambo Sur) |
