ni Claro A. Lanipa
Pagadian City, Feb. 6 (PIA) – Si Presidential Adviser on the Peace Process Teresita Quintos Deles ning miaging Biyernes midawat sa 2011 Metrobank Foundation Professorial Chair for Public Service and Governance Award alang sa iyang dungganong serbisyo sa natad sa kalinaw ug kalamboan isip usa ka miyembro sa katilingbanong sibil ug usa ka opisyal sa kagamhanan.
Ang maong seremonyas gipahigayon sa Escaler Hall of the Science Education Complex sa Ateneo de Manila University, Quezon City. Gitambongan kini ni Commission on Human Rights chair Etta Rosales, mga miyembro sa government peace panel nga si Miriam Coronel Ferrer ug Jurgette Honculada; Ateneo School of Government Dean Antonio La Viña, Metrobank Foundation Executive Director Aniceto Sobrepeña, Pax Cristi Pilipinas Director Cesar Villanueva, ug mga miyembro sa academe.
Si Deles mihatag sa usa ka professional lecture mahitungod sa kasamtangan kahimtang sa proseso sa kalinaw, lakip ang mga plano ug tumong sa administrasyong Aquino sa pagduso sa peace agenda niini.
Ang Metrobank Foundation, inabangan sa Ateneo School of Government, nagtanyag sa tinuig nga ganti ngadto sa mga bantunggang personalidad kinsa mipakita sa talagsaon gawi sa serbisyo pampubliko, nga maoy nakahimo kanila isip mga modelo alang sa gitawag ethical and effective public leadership sa nasud.
Sa milabay’ng kapin sa napulo ka tuig, gitukod sa maong foundation ang Professorial Chairs sa natad sa law, medicine ug public service and governance.
Sa 2009, si Department of Justice Secretary Leila de Lima midawat usab sa dungganong award alang sa iyang dedikasyon, pasalig ug walay mansa nga record isip usa ka election lawyer. Si Elections Commissioner Rene Sarmiento maoy nahimong Metrobank Professorial Chair alang sa iyang sulundon nga record isip usa ka abogado sa tawhanong katungod panahon sa Martial Law ug isip usa ka miyembro sa 1987 Constitutional Commission. (OPPAP/PIA9/CAL)
