ni Alfonso T. Ruda
DIPOLOG CITY, JAN. 23(PIA)---Ang Philippine National Police nagdeklarar karon ug all out war batok sa mga kriminal nga nagsakay ug motorsiklo nga maoy responsable sa kamatayon sa 2,089 ka tawo niadtong 2011.
Ang kamanduan gipakanaog ni PNP Chief, Director-General Nicanor Bartolome gumikan sa sunod-sunod nga nahitabong high-profiled criminal activities nga binuhatan sa mga tawong nagsakay ug motorsiklo nga gawasnong nagdagan-dagan sa kadalanan.
Ang labing ulahing kamanduan nga gipagawas sa Hepe sa PNP maoy maghatag ug giya sa kapulisan nga i-redirect ang operational thrusts sa tanang PNP units batok sa mga kriminal, ilabi na kadtong nakasakay sa motorsiklo nga maoy responsable sa nagpanghitabong high-profiled criminal activities.
“Gipahimuslan sa mga elementong kriminal ang sayon nilang paglihok pinaagi sa motorsiklo nga maoy gigamit paghimo ug krimen,” matod pa ni Bartolome.
“Usa ka nasudnong estratehiya ang giandam karon sa nasudnong kamanduan alang sa usa ka coordinated ug uniporming implementasyon sa operasyon sa kapulisan batok sa mga kriminal nga nagsakay ug motorsiklo nga nangbiktima sa mga inosenteng mga sibilyan sa kadalanan,” dugang pa ni Bartolome.
Ang campaign strategy usa ka maayong kombinasyon sa aksyon sa kapulisan sa usa ka bahin ug pagkamabinantayon sa publiko ug suporta sa komunidad sa laing bahin.
“Ang aksyon sa kapulisan langkuban sa reinforced police mobile ug visibility patrol nga ubanan sa pagpahigayon ug hugtanong checkpoint operations ug on-the-spot weapons check operations batok sa mga riding in tandem motorists ug nagsakay sa mga pampublikong mga sakyanan,” matod pa ni Supt. Agrimero Cruz Jr, tigpamaba sa PNP.
Ang mga membro sa media mao ang kadaghanan sa mga biktima sa mga kriminal nga nagsakay ug motorsiklo nga nagtinagurha.
Ang labing ulahing biktima mao si Christopher Guarin, 42 anyos nga beteranong komentarista ug Editor-Publisher sa usa ka lokal nga pamantalaan sa dakbayan sa General Santos nga gipusil-patay sa motorcycle riding in tandem gunmen sa atubangan sa iyang asawa sayo niining bulana.
Niadtong 2011, natala sa PNP ang 1,700 ka mga krimen nga gikalambigitan sa mga suspetsadong nagsakay ug motorsiklo uban ang 2,089 ka mga biktima.
Ang mga lugar diin kadaghanan nahitabo ang maong matang sa krimen mao ang Central Luzon ug Cavite, ug mga probinsiya sa Laguna, Batangas, Rizal ug Quezon (Calabarzon) ug Southern Mindanao.
Matod pa ni Bartolome, ang pagneutralize sa mga motoricycle riding in tandem criminals nagkahulugan sa kasulbaran sa uban pang mga krimen, sanglit kining maong mga kriminal nalambigit man usab sa lain pang mga krimen.
Nahisgutan ni Bartolome ang kalampusan sa Motorized Anti-Street-crime Operatives program sa National Capital Region Police Office nga napakibra ug dako sa mga kaso sa riding-in-tandem crimes.
Alayon niini, gidasig ni Bartolome ang mga rehiyonal nga buhatan sa PNP nga tun-an ang kasinatian sa operasyon sa NCRPO batok sa mga elementong kriminal nga nakasakay sa motorsiklo.(ATR/PIA9-Zambo Norte)
