ni Alfonso T. Ruda
DIPOLOG CITY, Jan. 22(PIA)--- Ang Department of National Defense naggahin ug 12 mil ka hektarya gikan sa reserbasyon sa militar sa tibuok nasaod aron himoong tree nursery sites.
Gibutyag kini ni Defense Sec. Voltaire Gazmin human sa serye sa miting uban sa mga ahensiya sa gobyerno nga nagpatuman sa nagpadayong National Greening Program sa gobyerno.
Pinaagi sa Executive order No. 26 nga gi-isyo ni Presidente Benigno Aquino III niadtong Pebrero 24, 2011, iyang gideklarar ang implementasyon sa National Greening Program aron pagconsolidate ug pagharmonize sa tanang greening efforts sa nasudnong kagamhanan, local nga kagamhanan ug tanang mga stakeholders ug mga pribadong institusyon.
Ang National Greening Program nagtinguha nga matamnan ug 1.5 bilyones ka kahoy ang 1 ug tunga ka hektaryang yuta gikan sa 2011 ngadto sa 2016.
“Ang Dertamento sa Nasudnong Panalipod nagpabiling malig-on sa iyang pasalig nga motabang pagpreserbar sa atong palibot.Kini mao ang among legasiya,” matod pa ni Gazmin.
Ilalom sa programa, ang DND mao ang gitahasan pag-establisar ug mga nurseries ug pagprodyus ug semilya, pagpreparar sa tamnanan, suportang pangtransportasyon ug seguridad.
Si Defense Undersecretary for Finance, Munitions, Installations and Materials, Gernando manalo mao ang gihatagan ug responsibilidad aron modumala ug mosuperbisar sa implemewntasyon sa NGP para sa DND-Armed Forces of the Philippines.
Ang buhatan sa Deputy Chief of Staff for Civil-Military Operations, mao ang natudlong ahensiya nga manguna sa maong gimbuhaton.
“Ang NGP nahasubay sa kasamtangang pagpaningkamot sa gobyerno nga makuhaan o mamenusan ang kadaot panahon sa kalamidad ug epekto sa kausaban sa klima. Kinahanglan, hingusgan nato ang atong pagpaningkamot atubangan sa sunod-sunod nga di-maayong nagpanghitabo, bag-ohay pa lamang,” matod pa ni Gazmin.
Uban sa implementasyon sa NGP, ang mga personahe sa DND ug AFP gimanduan nga magtanom ug labing ubos 10 ka semilya matag tuig sa matumbok nga tamnanan sulod sa mga reserbasyon sa military.
Pipila sa gikonsidera sa NGP ang Fort Magsasay sa Nueva Ecija; Kibaritan Military Reservations sa Bukidnon ug Lanao del Sur; Camp Peralta sa Capiz; ug VillaViciosa Military Reservations sa Abra.
Ang pormal nga paglusad sa DND-AFP NGP nga gipanguluhan ni Manalo gihimo niadtong Oktubre 11, 2011 didto sa Fort Magsaysay Military Reservation. (ATR/PIA9-Zambo Norte)
