ni Alfonso T. Ruda
DIPOLOG CITY, JAN. 23(PIA)--- Lakip ang Pilipinas sa mga nasod nga pondohan sa Global Fund, ang labing dakong financier sa antiAids, tuberculosis ug malaria program.
Si Assistant Secretary Eric Tayag, tigpamaba sa Department of Health nagkanayon nga ila karong gitun-an ug maayo ang mga hangyo ug programa sa gobyerno nga pondohan sa Global Fund.
Gihimong pananglitan ni Tayag ang gikinahanglang pondo alang sa HIV-AIDS prevention aron matabangan ang mga tawong nagpakabuhi nga dunay AIDS.
Matod pa ni Tayag, dunay mga rekisitos nga gikinahanglan ang Global Fund, apan sa pagkakaron, ang importante nga nalakip na ang Pilipinas nga pondohan niini.
Sukad sa pagsugod sa ilang operasyon niadtong 2002, miabot na sa 1,700 ka kinabuhi ang nasalbar sa Global Fund pinaagi sa paghatag ug tambal sa 3.3 milyones ka tawo nga dunay AIDS; 8.6 milyones ka tawong dunay TB; ug 230 milyones ka tawo nga nahatagan ug insecticide-treated nets aron di-matakbuyan ug malaria.
Sa pagkakaron, ang Global Fund nagkuha ug pondo gikan sa kontribusyon sa mga gobyerno sa malambuong mga nasod; uban ang Microsoft founder nga si Bill Gates, nga lakip sa daghang bilateral donors nga naghatag ug seed money para sa proyekto.(ATR/PIA9-Zambo Norte)
