ni Alfonso T. Ruda
DIPOLOG CITY, JAN. 15,(PIA)--- Malipayong gidawat sa Malakanyang ang resulta sa survey nga gihimo sa HSBC Expat Explorer nga nagpakita sa Pilipinas isip ikawalong pinaka-mahigalaong nasod sa tibuok kalibutan.
Sayo niini, ang 2012 Index of Economic Freedom nga napublikar sa The Wall street Journal ug The Heritage Foundation mihatag sa Pilipinas ug puntos nga 57.1 sa economic freedom nga naghimo sa ekonomiya sa Pilipinas nga ika-107 nga pinaka-gawasnon sa 2012 index. Kini mas taas ug 0.9 porsiento kay sa natala sa miaging tuig.
“Nalipay usab kami nga sa usa sa mga survey nga gihimo sa HSBC, ang Pilipinas nakakuha ug ranggo nga ika-walong mahigalaong nasod batok sa uban pang mga nasod nga gihatagan niini ug grado.Ug kini ang hinungdan nga nagtoo kami nga daghang kalingawan dinhi sa Pilipinas,” matod pa ni Deputy Presidential Spokesperson Abigail Valte.
Sumala pa sa resulta sa survey sa HSBC Expat Explorer nga gipagawas niadtong miaging tuig, ang Pilipinas mao ang ikawalong mahigalaong nasod sa kalibutan sa mga “expatriates”. Ang survey gihimo sa HSBC sa 3,385 ka mga expats sa 100 ka mga nasod taliwala sa Mayo ug Hulyo 2011.
Ang mga nasod gihatagan ug ranggo subay sa 4 ka kategoriya---abilidad nga makighigala sa mga lokal; kalampusan pagkat-on sa lokal nga pinulungan; kapasidad nga makigsagol sa ubang membro sa komunidad ug kasayon sa pagsagop sa bag-ong kultura.
Ang New Zealand mao ang nag-una sa listahan sa mga pinakamahigalaong nasod sa tibuok kalibutan diin mitala kini ug “perfect score” sa upat ka kategoriya.(ATR/PIA-Zambo Norte)
