ni Alfonso T. Ruda
DIPOLOG CITY, JAN. 15(PIA)—Miabot sa 122,678 ka mga indigent senior citizens (77 anyos pataas) ang natabangan sa Department of Social Welfare and Development (DSWD) pinaagi sa 500 pesos nga binulang pensiyon niadtong 2011.
Si DSWD Secretary Corazon “Dinky” Soliman nagkanayon nga ang inisyatibo nga naghatag ug 500 nga binulang pensiyon sa mga tigulang nakabutang sa Akta Republika 9994 nga mas naila usab isip Expanded Senior Citizens Act of 2010.
Si Soliman misaad nga mas daghan pang mga tigulang ang makapahimulos sa maong pograma karong tuiga.
Ang maong balaod naghatag ug prayoridad sa mga tigulang nga may sakit ug dunay kabilinggan sa panglawas; walay permanenteng kita o suportang gidawat gikan sa ubang membro sa pamilya; ug walay gidawat nga pensiyon gikan sa gobyerno o sa unsa mang pribadong ahensiya.
Ang prayoridad nga benepisyaryo sa programa mao kadtong mga tigulang nga nagpangidaron ug gikan 77 anyos pataas.
Ang listahan gipasikad sa resulta sa survey nga gihimo sa DSWD ilalom sa National Household Targeting System for Poverty Reduction nga maoy nag-ila kon kinsa ug asa nagpuyo ang angayng makapahimulos sa tag 500 pesos nga binulang pension gikan sa DSWD.(ATR/PIA9-Zambo Norte)
