ni Alfonso T. Ruda
DIPOLOG CITY, JAN. 16(PIA)---Ang Pilipinas subling nanawagan sa ubang mga nasod nga membro sa Association of Southeast Asian Nations (ASEAN) nga maghatag ug malig-ong baruganan alang sa kasulbaran sa problema sa West Philippine Sea pinaagi sa pagsuporta sa gipangayo niining pagpahigayon ug tigom sa lakip na ang Tsina, uban sa pag-giya sa ASEAN.
“Ang Pilipinas nanawagan sa ilang mga kaubang membro sa ASEAN nga suportahan ang gi-sugyot nga claimant states’ meeting, diin ang Pilipinas nagpahayag ug kaandam nga mahimong host sa miting. Malipayon namong gidawat nga mahimong host sa miting kon gusto nilang suportahan ang sugyot sa Pilipinas nga rules-based approach sa rehiyon,” matod pa ni Foreign Affairs Secretary Albert del Rosario.
Sumala pa ni del Rosario, gipaabot na lang karon sa Pilipinas ang positibong tubag sa ilang gipangayong claimant states meeting gikan sa ASEAN.
Patin-aw pa sa Kalihim, ang rules-based approach mao lamang ang bugtong solusyon sa problema sa Spratlys ug ma-establisar ang United Nations Conventions on the Law of the Sea (UNCLOS).
Ang rules-based approach ilalom sa UNCLOS nanawagan alang sa resolusyon sa problema pinaagi sa malinawong paagi, mao nga gisugyot sa Pilipinas ngadto sa ASEAN ang pagpabarog ug Zone of Peace, Freedom, Friendship and Cooperation isip actionable framework aron maklaro ug mabahig-bahig ang giilogang isla gikan sa wa-giilogang kadagatan sa West Philippine Sea. “Sa maong paagi, matubag ang isyo sa 9-dash line," matod pa ni del Rosario.
Gikonsidera usab sa Pilipinas ang third-party adjudication, arbitration o conciliation nga usa ka tukmang settlement mechanism sa UNCLOS. (ATR/PIA9-Zambo Norte)
