ni Franklin P. Gumapon
DIPOLOG CITY, Jan. 16 (PIA) - - Gipahayag ni Supreme Court (SC) Spokesman and Court Administrator Jose Midas Marquez nga walay court holiday atol sa pagbukas sa impeachment trial ni Chief Justice (CJ) Renato Corona sa Senado karong hapon.
Hinoon, si Maquez nagkanayon nga ang mga empleyado sa regional trial courts sa mga dakbayan sa Manila ug Quezon miduso sa ilang leave of absence karong adlawa isip paghatag ug suporta ngadto sa chief justice.
Ang mga empleyado sa korte mitambong sa flag raising ceremony ganihang buntag didto sa korte suprema ug mipatalinghug sa mga pamahayag ni Corona.
Sa laing bahin, si Jojo Guerrero, presidente sa SC Employees Association (SCEA) misugilon nga kadagahanan sa mga empleyado sa RTC miduso ug tunga sa adlawa nga “leave” niining adlawa aron sa pagtambong sa mga kalihukan sa korte suprema.
Ang Senate Impeachment Court mobukas karong alas dos sa hapon aron sa pagpaminaw sa walo ka articles of impeachment nga gipasaka sa mga magbabalaud sa ubos balay-balauranan batok ni chief justice Cororna. (FPG/PIA-Zamboanga del Norte)
