ni Franklin P. Gumapon
DIPOLOG CITY, Jan. 11 (PIA) - - Nangulo si Sekretaryo Corazon Juliano-Soliman sa Department of Social Welfare and Development (DSWD) sa usa ka groundbreaking alang sa pagtukod sa bag-ong edipesyo sa maong buhatan didto Batasan Hills, Quezon City karong bag-o.
Ang tulo ka andana nga edipesyo nga ginganlan ug Millennium Challenge Corporation (MCC)-Kapit-Bisig Laban sa Kahirapan-Comprehensive and Integrated Delivery of Social Services (MCC-KALAHI-CIDSS) building, maoy butangan sa Management Information System Service Data Center, Panatawid Pamilyang Pilipino Program- Management Office, National Household Targeting System-Poverty Reduction ug ang Central Office Dormitory alang sa mga rehiyonal nga opisyales ug empleyado sa DSWD.
Mitambong sa maong okasyon si MCC Country Director Matthew Bohn, MCC Account Philippines Managing Director Marivic Añonuevo ug ubang opisyales sa DSWD.
Dugang nasayran nga ang maong groundbreaking usa sa mga nanag-unang kalihukan subay sa ika 61 nga anibersaryo sa DSWD nga pagasaulogon sa tibook bulan sa Enero.
Ang maong edipesyo may gidak-on nga 320 square meters ug nagkantidad sa P6,398,455 kansang pundo nagagikan sa MCC ug tukoron sa pakigtimbayayong sa Department of Public Works and Highways (DPWH) ug DSWD.
Sugdan pagtukod ang nasampit nga edipesyo karong sunod bulan ug humanon kini sulod sa 120 ka adlaw.
Gipasabot ni Soliman nga gikinahanglan ang maong edipesyo taliwala sa nagkadaghan nga mga empleyado sa DSWD nga maoy mo-implementar sa Pantawid Pamilyang Pilipino Program (4Ps), KALAHI-CIDSS ug uban pa.
Dugang pa ni Soliman nga mahatagan na unya ug maayong kapuy-an ang mga empleyado gikan sa mga rehiyon kon mu-adto sa kauluhan nga didto papuy-on sa dormitory nga ipahimutang sa maong edipesyo. (FPG/PIA-zamboanga del Norte)
