ni Alma L. Tingcang
PAGADIAN CITY , Jan 11 (PIA) – Ang Department of Foreign Affairs mipataas sa crisis alert level ngadto sa level 3 didto sa South Sudan, nagpasabot kini sa boluntaryong pagpauli sa mga OFWs didto tungod sa nagkagrabeng sitwasyon sa inter-ethnic nga kagubot sa maong nasod, ug alang usab sa proteksiyon sa mga Pinoy nga nagtrabaho didto.
“Aron paglikay sa mga panghitabo, gipataas namo ang crisis alert level 3 didto sa South Sudan tungod sa kagubot sa maong lugar diin kadaghanan sa atong mga kababayan atua didto. Andam kami pagpapauli sa atong mga katawhan didto, kung gusto nilang mobiya sa maong dapit,” si Foreign Affairs Secretary Albert F. del Rosario miingon.
Ubos sa crisis alert level 3, ang boluntaryong pagpauli sa mga Pinoy nga gustong mopauli tungod sa tensiyon sa nasangpit nga lugar gastohan sa gobyerno.
Sa pakig-koordinasyon tali kini sa Department of Labor and Employment ug ang deployment ban giisa karon nahimong epektibo sugod karon dayon.
Sa samang paagi, gipahimangnoan usab ang mga Pilipino sa dili pagbiyahe sa South Sudan karong mga panahona.
Ang DFA nagmando sa Philippine Embassy didto sa Cairo nga adunay jurisdiction sa South Sudan, nga i-implementar ang programa alang sa boluntaryong pagpauli sa mga Pilipino.
Adunay 150 ka mga Pinoy ang atua sa South Sudan, kasagaran anaa sa mga kompanya sa konstruksiyon, sa United Nations ug mga non-governmental organizations.
Ang embahada sa Pilipinas nag-dispatch usab ug consular assistance aron paghatag ug ayuda ngadto sa mga Pilipino nga gustong mopauli.
Sumala pa, ang lugar diin adunay tensiyon anaa lamang sa mga dapit sa border tali sa Sudan ug South Sudan. Ang South Sudan midaog sa ilang independensiya gikan sa nahaunang dapit niadto lamang Hulyo, 2011. (ALT-PIA9/Zambo Sur)
