ni Franklin P. Gumapon
DIPOLOG CITY, Jan. 11 (PIA) - - Subling nanawagan ang kagamhanan sa Pilipinas ngadto sa Moro Islamic Liberation Front (MILF) nga sugdan na ang paghimo sa kasabutan alang sa kalinaw sulod sa unang tulo kabulan ning tuiga samtang gipahigayon ang ika-24 nga exploratory talks sa duha ka habig didto sa Kuala Lumpur.
Gipahayag ni manlalaban Marvic Leonen, ang government chief negotiator, nga usa ka maayong higayon nga makahimo na ug kasabutan alang sa kalinaw sulod sa first quarter ning tuiga.
Dugang pa ni Leonen, ang kasamtangang pamunu-an ni Presidente Aquino gustong makakaplag ug kasulbaran sa suliran sa Bangsamoro sa nasud.
Gihangyo ni Leonen ang MILF nga sugdan na ang pag-umol sa kasabutan sa madaling panahon aron masulayan kini ug makahimo sa mga “adjustment” sa dili pa motapus ang termino sa Presidente.
Gilantaw usab ni Malaysian facilitator Tengku Dato Ab Ghafar Tengku Mohamed nga makakab-ot ug kasabutan ang duha ka habig.
Gipasabot usab ni Leonen nga makatabang sa Pilipinas ang pagmugna ug usa ka rehiyon alang sa mga katawhan sa Bangsamoro nga tinuoray’ng gawasnon apan nagsubay sa usa ka ligdong ug maayong pang-gobyerno.
Hinoon, gipadayag ni Leonen nga mahinungdanon ang usa ka malig-on nga relasyon tali sa nasudnong kagamhanan diha sa ensakto ug angay nga pagbahin-bahin sa bahandi ug abot aron masiguro ang matuod nga awtonomiya. Ug kini ang pagasabutan pag-ayu panahon sa negosasyon.
Sa pagkakaron, adunay mga bag-ong member sa panel nga gilangkuban nila ni Dr. Hamid Barra ug Yasmin Busran-Lao isip mga permantenteng membro alang sa habig sa kagamhanan. Ang duha nahimong consultants sa kagamhanan ug nakahimo sila pag-attend sa gihimong negosasyon niadtong buwan sa Desembre sa miaging tuig.
Ang laing duha ka membro sa habig sa kagamhanan mao sila si kanhi sekretraryo sa Agriculture Senen Bacani ug Prof. Miriam Cornel-Ferrer. (FPG-PIA-Zamboanga del Norte)
