ni Alfonso T. Ruda
DIPOLOG CITY, JAN. 13(PIA)--- Ang Inter-Agency Council Against Trafficking (IACAT) nagpanday UG mga paagi pag-assess sa mga pasaherong mobiyahe pagawas sa nasod agi sa nagkalain-laing tugpahanan ug pantalan sa tibuok nasod.
Tumong sa gihimo sa IACAT nga mapakgang ang way-kontrol nga pagdiskarga ug mga pasahero ug malikayan ang pagpangilkil sa mga personahe sa mga tugpahanan ngadto kanila.
Alayon niini, si Justice Secretary Leila De Lima, kinsa mao ang Chairperson sa IACAT, nag-isyo gilayon ug memorandum nga nagmando sa hinanaling implementasyon sa bag-ong “Guidelines on Departure Formalities for International- Bound Passengers in all Airports and Seaports in the Country” niadtong Enero 3, 2012 taliwala sa nagtipun-og nga reklamo gikan sa gipangdiskargang mga pasahero nga giingong gipangilkilan sa pipila ka mga personahe sa mga tugpahanan.
Ang gabayan naghatag ug tukmang parameters alang sa higpit nga implementasyon sa immigration departure formalities nga nagtumong nga masanta ang trafficking in persons, illegal recruitment ug uban pang susamang kalapasan.
Sayo niini, si IACAT Undersecretary-in-Charge Jose Vicente Salazar nakigtagbo sa Technical Working Group nga gilangkuban sa mga representante gikan sa Office of the Vice President, Bureau of Immigration, Department of Social Welfare and Development, Department of Labor and Employment, Department of Foreign Affairs, Commission on Filipinos Overseas, National Bureau of Investigation, Philippine National Police, ug Philippine Overseas Employment Administration aron tun-an ug magpanday ug mga polisiya ug mga gabayan nga ipatuman sa nagkalain-laing tugpahanan ug pantalan sa nasod.
Sa samang higayon, ang mga non-government organizations sama sa Visayan Forum Foundation, ang International Justice Mission, ug ang Blas Ople Policy Center gikonsulta usab may kalabutan niini.
Si Salazar mipasalig sa mga nagreklamo nga ang IACAT nga mao ang nag-unang ahensiya nga gitahasang mosumpo sa human trafficking ug uban pang kalapasan magpatuman gyud sa maong gabayan aron masanta ang mga pagpang-abuso, pagpanghasi ug papangilkil sa mga gawsanang tugpahanan ug pantalan sa nasod.
Usa sa planong himoon sa IACAT ang pagbutang ug closed-circuit television systems ug voice recorders sa mga tugpahanan ug pantalan aron magmonitor sa adlaw-adlaw nga kalihokan sulod sa mga tugpahanan ug mga pantalan.
Ang gabayan nakita usab nga mopataas sa katuyoan pag-assess sa mogikan nga mga pasahero ug mopakita sa tin-aw nga pagsunod sa mga hingtungdang mga otoridad.
Magpaubos usab kini sa diskresyon sa mga opisyal sa imigrasyon pinaagi sa higpit nga implementasyon sa napanday nga mga gabayan ug regulasyon
Ang gabayan gibase sa pipila ka kasamtangang balaod sama sa Akta Republika numero 9208 nga mas naila isip “Anti Trafficking in Persons Act of 2003” ang iyang implementing Rules and Regulations; Akta Republika Numero 8042 nga mas naila usab isip “Migrant Workers and Overseas Filipinos Act of 1995.”
Ang pito-ka-pahinang dokumento gi-isyo aron higpit nga sundon sa tanang ahensiya nga membro sa IACAT.(ATR/PIA9-Zambo Norte)
