ni Claro A. Lanipa
Pagadian City, Jan 13 (PIA) – Gipirmahan kagahapon (Enero 12) sa Department of Interior and Local Government (DILG) ug and World Vision sa usa ka kasabutan sa tinguha sa pagtuboy sa kaayohan sa mga kabataan pinaagi sa pag-usbaw sa mga buluhaton sa local council for the protection of children (LCPC) sa mga komunidad.
Si DILG Secretary Jesse Robredo ug World Vision Executive Director Elnora Avarientos mipirma sa Memorandum of Agreement gitumong sa pagpadayon sa capacity building and participation program nga makapauswag sa pagka-epektibo ug mga tulumanon sa LCPC.
Ang seremonyas gipahigayon sa DILG Central Office sa Quezon City, gisaksihan ni DILG Undersecretary Austere Panadero, National Barangay Operations Office Director Virgilio Castro ug World Vision Public Engagement Director Filomena Portales.
Ang World Vision usa ka organisasyon nga nagtutok sa mga buluhaton alang sa mga kabataan, pamilya ug komunidad, ilabi niadtong mga kabus nga dapit ug mga komunidad apektado sa kalamidad sa tibuok nasud.
Matod pa ni Robredo and DILG ug World Vision adunay susamang panglantaw sa pagtuboy alang sa maayong interes sa mga kabataan pinaagi sa pagmugna ug usa ka kalikupan nga maamomahon ug luwas alang sa mga kabataan sa pagpalambo sa hingpit.
Dugtong pa niya, “ aron motabang kanato nga makab-ot niining tinguha o tumong, kinahanglan seguroon nato nga epektibo ug aktibo ang atong mga LCPCs aron makabaton kita sa usa ka amomahon nga kalikupan alang sa mga kabataan ug moatiman sa ilang kaayohan.”
Sa Artikulo 87 sa Presidential Decree No. 603 sa Child and Youth Welfare Code lakip ang Section 15 sa Akta Republika 9344 kon ang Juvenile Justice and Welfare Act of 2006, nagmando sa pagtukod sa LCPCs sa tanang mga probinsya, siyudad ug lungsod hangtod sa mga kabarangayan.
Sa natala sa NBOO nagpadayag nga sa pagka-karon adunay 5,169 LCPCs (37 ka mga probinsya, 66 ka mga siyudad, 307 ka mga lungsod ug 4,759 ka mga barangay) nga naglihok alang sa katungod ug kaayohan sa mga kabataan sa ilang dapit. (DILG/PIA9/CAL)
