ni Alma L. Tingcang
PAGADIAN CITY , Jan 11 (PIA) – Ang Department of Health gitakdang mohatag ug rotavirus vaccines ngadto sa mga kabataan sa mokabat ug 5.2 milyon ka pamilyang kabos sugod karong Abril, 2012.
Ang rotavirus vaccine mopanalipod sa kabataan batok sa rotavirus nga maoy nag-unang hinungdan sa grabeng pagkalibanga sa mga puya ug mga bata. Ang oral vaccines ihatag sa duha o tulo ka doses human sa upat ka semana nga paglak-ang.
Si Health Secretary Enrique T. Ona miingon nga ang immunization drive gilaoman nga ihatag alang sa 700,000 kabataan nga nag-edad gikan sa 6-14 semana lamang niining mga kabos nga pamilya.
Si Ona mihimo sa maong pamahayag atol sa 13th Asian Conference on Diarrheal Disease and Nutrition (ASCODD) nga gipahigayon kagahapon sa Taal Vista Hotel sa Tagaytay City.
Siya miingon nga ang DOH nag- andam ug P700 milyon aron pagpalit sa mga vaccines alang sa mga puya nga nagpuyo sa mga pinakakabos nga dapit sa nasod diin ang programang Conditional Cash Transfer (CCT) sa DSWD gi-implementar.
“Dili nato ikalimod nga kinahanglan tagaan ug espesyal nga atensiyon ang mga kabataan, diin kadaghanan kanila nag-antos sa mga sakit nga puwede mapugngan o matambalan. Ang diarrhea usa niining maong mga sakit ug ikaduhang kasagarang hinungdan sa kamatayon sa mga bata,” si Ona miingon.
Ang rotavirus infection kusog kaayo motakod. Motakod kiini pinaagi sa hugaw ug kontaminado nga kamot. Pwede usab kini motakod pinaagi sa kontaminadong dulaan, kuna, unlan ug mga beddings.
Dili pa lang dugay, ang mga scientists nagduda nga ang rotavirus puwede motakod pinaagi sa hangin tungod kay nakit-an nila ang virus sa migawas gikan sa respiratory tracts sa mga bata.
Ang Pilipinas maoy labing unang nasod sa Asya nga mipalakip sa rotavirus vaccine ngadto sa ilang Immunization Program.
“Lima ka tuig pagkatapos niini, agig pagtuman sa rekomendasyon, naghimo kita ug lakang aron makunhoran, o dili ba kaha mawagtang ang kabug-aton sa grabeng kalibanga ug mo-contribute aron pagkunhod sa kalibotanong under-5 mortality o sa MDG No. 4 nga pagkunhod sa maternal ug infant mortality,” panapos nga pahayag ni Ona. (ALT-PIA9/Zambo Sur)
