ni Alfonso T. Ruda
DIPOLOG CITY, JAN. 11(PIA)--- Ang Home Mutual Development Fund (PAG-BIG) maningkamot karong tuiga nga hingpit na nga mapatuman ang mandatory provision sa Akta Republika 9679, ang Home Mutual Development Fund Law sa 2009.
Ilalom sa RA 9679, ang pagpamembro sa PAG-IBIG obligado alang sa tanang mga employer ug mga empleyado nga masakop ug kinahanglang magpamembro sa Social Security System (SSS) ug Government Service Insurance System (GSIS).
Sumala pa sa PAG-IBIG, duna pay 250 mil ka mga employer sa nasod ang wala marehistro sa PAG-IBIG.
“Kining maong mga employer naghikaw sa ilang mga empleyado sa benepisyong mahimomg memboro sa PAG-IBIG--- benepisyong naglakip sa long-term savings; kahigayonan nga makapahimulos sa utang sa pabalay; oportunidad alang sa short-term cash loans panahon sa panginahanglan kon emerhensiya,” matod pa ni PAG-BIG Executive Director Atty. Darlene Marie Berbesabe.
Aron matabangan ang PAG-IBIG nga mapatuman ang maong balaod, misulod kini sa usa ka kasabutan uban sa mga kagamhanang-lokal sa nasod nga maghimong obligado ang pagpamembro sa PAG-IBIG sa dili pa i-renew ang business permit sa usa ka patigayon.
“Hinuon, giangkon sa PAG-IBIG nga dunay mga employer nga napakyas pagparehistro gumikan sa natigom nga penalidad sa wala makolekta ug wala maremit nga kontribusyon, “ matod pa ni Berbesabe.
“Gumikan niini, gipatuman karon sa Fund ang penalty condonation program para sa wala marehistro ug mga delinquent employers sugod niadtong Enero 2 hangtud sa Hunyo 30, 2012 lamang.” Sanglit hamubo lang ang panahong gilugway sa PAG-IBIG, gi-awhag ni Berbesabe ang mga employer nga wala pa makaparehistro nga pahimuslan kining maong programa. “Human sa Hunyo 30, wala na kamiy mahimo kon dili ang pagpasaka ug kaso batok sa mga employer nga mapakyas pagparehistro sa PAG-IBIG isip tipik sa hugtanong kampanya alang sa hingpit nga implementasyon sa mandatory provision sa Akta Republika 9679,” panapos pa ni Berbesabe.(ATR/PIA9-Zambo Norte)
