ni Franklin P. Gumapon
DIPOLOG CITY, Jan. 20 (PIA) - - Gibutyag atol sa usa ka international forum didto sa nasud sa Malaysia ni Presidential Adviser on the Peace Process Teresita Quintos-Deles karong bag-o nga magpadayun ang pagpangita’g kasulbaran alang sa suliran sa kalinaw sa isla sa Mindanao.
Sa iyang pagpakigpulong sa usa ka panagtigum nga nag-ulohan “consolidation for Peace for Mindanao” (COP) didto sa University Sains Malaysia sa Pulau Pinang, Malaysia, si Deles misugilon nga magpadayun ang pagkaplag sa kahusay ug kalinaw sa Mindanao dili pinaagi sa armas kon dili sa panagsabot o negosasyon sa mga nagkadaiyang hut-ong sa nasampit nga dapit.
Ang maong tigum gipasiugdahan sa Research and Education for Peace, REPUSM, Japan International Cooperation Agency and Southeast Asian Conflict Studies Network.
Gibutyag ni Deles nga ang pamunuan ni Pangulong Aquino kusganong nagtinguha nga makab-ot ang kasabutan sa kalinaw tali nsa Moro Islamic Liberation Front (MILF) sa madaling panahon, o sa dili pa muabot ang tuig 2013.
Dugang pa ni Deles nga ang kagamhanang Aquino kusganong nagpaluyo sa mga panagsabot alang sa kalinaw ug nagtinguha nga maundang na ang panagbangi tali sa mga rebelde ug sa kagamhanan.
Giangkon ni Deles nga ang pagkaba-ot sa kalinaw dinhi sa Mindanao dili sayon, apan ang gobyerno mopadayun gihapon sa pagpangita’g kasulbaran niini.
Kahinumduman nga ang kalinaw sa Mindanao maoy nag-una sa mga prayoridad ni Pangulong Aquino. (FPG/PIA-Zamboanga del Norte)
