ni Franklin P. Gumapon
DIPOLOG CITY, Jan. 20 (PIA) - - Nagpadayun karon ang kagamhanang Aquino nga mapahimutang ang mga kausaban alang sa maayong pangagamhanan ug lig-ong panagtambayayong sa mga silingang nasud sa Southeast Asia alang usa ka luwas ug malambo-on nga Pilipinas.
Kini ang pamahayag karong bag-o ni Presidential Spokesman Edwin Lacierda human nahidangat dinhi sa nasud ang Primero Ministro sa nasud sa Thailand nga si Yingluck Shinawatra.
Matud pa ni Lacierda ang pagpakig-gubat batok sa korapsyon ug kagutom kanunay’ng magkuyog kauban sa pagpahimutang ug kausaban diha sa pagdumala sa kagamhanan ug lig-on nga relasyon tali sa mga silingang nasud sa natad sa ekonomiya ug seguridad.
Ang panagtagbu sa duha ka pangulo-nasud sa Pilipinas ug Thailand nagtinguha sa pagpalambo sa negosyo dinhi sa Southeast Asia ug mapaminosan ang epekto sa mga kalamidad dala sa kausaban sa panahon ug seguridad sa kasadpang bahin sa Pilipinas.
Gipasabot ni Lacierda nga ang pagbisita ni Shinawatra mipalig-on sa relasyon sa duha ka nasud sa sulod na sa 63 ka tuig karon.
