Ni Alma L. Tingcang
| PAGADIAN CITY, January 20 - - Ang unang hugna sa mga Pinoy crew sa nasangyad nga barkong MV Costa Concordia midangat na sa Manila kagahapong adlawa sakay sa Cathay Pacific ug Thai Airways nga biyahe gikan sa Roma, Italya. Ang Department of Foreign Affairs (DFA) miingon nga si Philippine Ambassador ngadto sa Italya nga si Virgilio Reyes Jr. personal nga mipagikan ug mitabang sa 108 Pinoy crew members sa dihang misakay na sila didto sa Fiumicino Airport sa Roma niadtong Miyerkoles. Si Foreign Affairs Executive Director for Migrant Workers Affairs Ricardo Endaya ug Foreign Affairs Special Assistant Atty. Enrico Fos, kauban ang mga representante sa Office of the Vice President (OVP), Department of Labor and Employment (DOLE) ug ang Overseas Workers Welfare Administration (OWWA) mitagbo sa mga Pinoy crew members didto sa Ninoy Aquino International Airport (NAIA). Ang ikaduha ug ikatulo ka hugna sa mga Pinoy crew members gitakdang modangat sa Manila karong adlawa, Enero 20 hangtod sa 21. Ang Costa Crociere S.p.A., ang kompanya nga maoy tag-iya sa nasangpit nga cruise ship mipasalig sa Emergency Response Team sa embahada nga ihatag niini ang kinatibuk-ang sweldo ngadto sa mga trabahante, bayaran ang nawala nilang kwarta ug mga butang, ug mag-isyu sa pormal nga sulat nga magdetalye sa mga gisaaad sa kompanya. Lakip sa response team, gi-activate usab ang nerve center for operations sa embahada didto sa Roma aron makig-koordinasyon sa mga lakang nga gihimo sa response team ingon man paghatag ug feedback gikan sa mga opisyales sa Costa Corcordia ug ubang ahensiya, ug mapaneguro ang paghatag ug tukma nga taho ngadto sa DFA. (ALT-PIA9/Zambo Sur) |
