ni Alfonso T. Ruda
DIPOLOG CITY, JAN. 19(PIA)--- Gilusad na sa Department of Energy (DOE) ang “Bright Now! Do Right. Be Bright. Go E-Trike” design-an-electric tricycle contest nga magpromote sa innovation ug ingenuity sa mga Filipino paghimo ug Philippine version sa gitawag nga”green vehicle.”
Ang design an e-trike contest bukas alang sa tanang mga Filipino, hingkod ang pangidaron, ma-individual man o grupo nga nagpuyo dinhi sa Pilipinas.
Ang contestant kinahanglang maka-generate ug 2D ug 3D computer-aided drawings nga dunay labing maayong functional design para sa hitsura sa E-trike sa Pilipinas sa umaabot nga mga adlaw.
Ang entry kinahanglang magpakita sa desinyo nga mahimong kargahan ug 6 ka mga pasahero, gawas sa drayber.
Kinahanglang duna lang usab kiniy tulo ka ligid. Ang mga sample sa three-wheeled vehicles ug uban pang detalyadong impormasyon sa contest mahimong makita sa website sa DOE (doe.gov.ph).
Gusto ni Energy Secretary Jose Rene Almendras nga ang desinyo magamit dili lamang sa siyudad kundili hangtud na sa mga tawo sa probinsiya.
Matod pa ni Almendras, ang electric tricycles mahimong i-promote isip “rural electric vehicle” kon RUV sanglit traysikel man lang ang matang sa sakyanan nga naa sa ubang mga lalawigan.
Ang electric tricycle program hiniusang gipatuman pinaagi sa pagtinabangay sa DOE ug Asian Development Bank isip tipik sa ilang National Electric Vehicle Strategy.
Samtang gidevelop ang estratehiya, sugdan usab pagpaila sa DOE ang e-tricycles, e-buses, ug e-cars uban sa pakigtinabangay sa mga local nga mga negosyante ug mga technical experts.
Sa kasamtangan, gidevelop sa ahensiya ang sustainable model sa traysikel nga gipadagan pinaagi sa kuryente. (ATR/PIA9-Zambo Norte)
