ni Franklin P. Gumapon
DIPOLOG CITY, Jan. 19 (PIA) - - Padayung naningkamot karon si Pangulong Benigno Simeon C. Aquino nga mouswag ang ekonomikanhong kahimtang sa nasud.
Kini taliwala sa bag-ong gipagawas nga survey sa Bank of America-Merill Lynch nga nagpakita nga ang Pilipinas gilantaw sa mga global fund manager nga ikatolo sa mga paboritong merkado sa kalibutan.
Matud pa sa maong pagto-on, ang Pilipinas nahimong ikatolo sa “most preferred market” sa tibook kalibutan sa mga global fund manager sunod sa China ug Indonesia.
Gipahayag ni Presidential Spokesperson Edwin Lacierda nga gilauman usab nga human misaka ang kredito sa Pilipinas sa upat ka ang-ang, mosunod usab pagsaka ang investment grade sa nasud sa katapusan ning tuiga.
Dugang pa ni Lacierda nga ang pagsalig sa mga negosyante misaka tungod sa mga kausaban nga gipatuman sa Presidente.
Sumala sa taho nga ang sub-sub nga pagsaka sa “credit rating” sa mi-aging nagpasabot lamang nga ang ekonomikanhong programa ni Presidente Aquino anaa sa ensaktong pagkabutang.
Ang Fitch Ratings mipataas sa iyang credit rating sa Pilipinas ngadto sa BB+ gikan sa BB niadtong Hunio sa milabay’ng tuig.
Laing credit rating company, and Standard and Poor’s, mipasaka sa ilang paglantaw sa nasud ngadto sa “positive” gikan sa “stable” sa Nobyembre sa mi-aging tuig. Kini nagpakita sa lig-ong panudlanan sa kagamhanan ubos sa bag-ong administrasyon.
Ang pagtubo sa ekonomiya sa nasud naggumikan sa kausaban nga gipatuman ni Pangulong Aquino uban sa polisiya sa kaangayan, kaakohan, pagpadayag ug maayong pangagamhanan. (FPG/PIA-Zamboanga del Norte)
