Ni Alma L. Tingcang
| PAGADIAN CITY, January 19 - - Ang ekonomiya sa Pilipinas gitakdang motubo ug 4.2% ning tuig tungod sa mas taas nga remittances gikan sa mga overseas Filipino workers (OFWs) ug pagbag-o sa pamaagi sa galastohan, kini sumala pa sa taho gikan sa World Bank. Sa Global Economic Prospects 2012, ang nagpahulam nga ahensiya kinsa nakabase sa Washington miingon nga ang padayong makusog nga remittance inflows ug bag-ong paagi sa paggasto gilaomang mopalig-on sa gross domestic product (GDP) sa Pilipinas ngadto sa 4.2% ning tuiga. Ang GDP mao kadtong kinatibuk-ang bili sa tanang mga butang ug serbisyo nga gihimo dinhi sa nasod. Niadtong tuig 2011, ang World Bank mitagna nga ang ekonomiya sa Pilipinas motubo ngadto sa 3.7%. Sa unang tulo ka quarter, ang GDP mitubo ngadto sa 3.6%, mas ubos kaysa target sa gobyerno nga 5%-6%. Samtang ang National Statistical Coordination Board moluwat sa kinatibuk-ang GDP alang sa 2011 karong Enero 30. Ang World Bank mi-project usab ug 5% GDP growth alang sa Pilipinas sa tuig 2013. Ang kalibotanong ekonomiya misulod sa usa ka malisod nga hugna diin makita ang pagdahili niini. Sa maong taho gikan sa World Bank, nagpakita usab kini nga ang mga exporters sa Pilipinas, Malaysia, Indonesia, Thailand ug Vietna, apektado sa nagkahinay nga import demand sa Organization for Economic Cooperation and Development (OECD) nga mga ekonomiya. Bisan pa man sa mangitngit nga kalibotanong kalikopan, ang World Bank miingon nga ang pagtubo sa East Asia ug Pacific region gi-project nga mohinay ngadto sa 0.4 percentage points ngadto sa 7.8% sa 2012 ug ma-stabilisar kini ngadto sa 7.8% sa tuig 2013. (ALT-PIA9/Zambo Sur) |
