ni Alfonso T. Ruda
DIPOLOG CITY,JAN. 18(PIA)---Kapin kon kulang 153 ka mga langyawng illegal nga nagpuyo dinhi sa nasod, lakip na ang mga pinangita sa balaod sa ilang nasod ang nasikop sa mga otoridad gumikan sa paglapas sa balaod sa imigrasyon dinhi sa Pilipinas niadtong 2011.
Si Immigration Commisisoner Ricardo David Jr., nagkanayon, nga ang mga langyaw nadakpan pinaagi sa nagkalain-laing operasyon nga gilusad sa mga operatiba sa Intelligence Division and Fugitive Search Unit sa Bureau of Immigration niadtong miaging tuig.
Matod pa ni David, ang nadakpang mga langyaw sa 2011 mas daghan kaysa nadakpan niadtong 2010 nga 94 ka mga langyaw.
Ang operasyon sa BI niadtong miaging tuig gipatuman pinasikad sa kamanduan nga gipagawas ni David human nakita sa gihimong imbestigasyon nga daghang mga langyaw ang illegal nga nagtago dinhi sa Pilipinas.
Ang nasangpit nga mga langyaw gipasakaan sa mga prosecutors sa Bureau of Immigration ug kasong deportasyon atubangan sa BI Board of Commissioners.
“Dili namo luagan ang kampanya batok sa mga illegal nga langyaw. Dili namo tugtan nga dunay mga langyaw nga dili mosunod sa atong balaod sa imigrasyon ug pinangita sa balaod sa ilang nasod ug naghimo lang sa Pilipinas nga ilang tago-anan,” matod pa ni David.
Sa 153 ka mga langyaw nga nadakpan, 99 niini ang gipasakaan ug nagkalain-laing kaso may kalabutan sa paglapas sa balaod sa imigrasyon, samtang 54 ang milikay sa kasal-anan nga ilang nahimo didto sa ilang nasod ug nagtago dinhi sa Pilipinas.
Matod pa ni Atty. Ma. Antonette Mangrobang, Acting BI Intelligence Chief, nga kadaghanan sa mga langyawng nadakpan napabalik na sa ilang gigikanang nasod.
“Gidid-an na sila karon nga makasulod ug balik sa atong nasod ang mga napadeportnga mga langyaw, human nga nalakip ang ilang ngalan sa listahan sa mga “undesirable aliens,” matod pa ni Mangrobang. (ATR/PIA9-Zambo Norte)
