ni Alfonso T. Ruda
DIPOLOG CITY, JAN. 18,(PIA)--- 90.5 porsiento sa 868.9 bilyones ka pesos nga pahat sa nagkalain-laing departamento sa gobyerno karong 2012 ang napagawas na sa Department of Budget and Management sa unang duha ka semana sa Enero.
Matod pa ni Budget Secretary Florencio “Butch” Abad, 47.3 porsiento kon 858.8 bilyones ka pesos usab sa kinatibuk-ang 1.816 tirlyones ka pesos nga General Appropriations sa tuig 2012 ang napagawas na sa DBM sa unang bahin niining bulan sa Enero.
Dugang pa sa Kalihim, nga ang dakong bulto sa pondo nga sayong napagawas sa DBM karong tuiga mao lamay manipestasyon sa kamatinud-anon sa administrasyong Aquino nga mapatuman sa tukmang panahon ang mga proyekto ug programa sa gobyerno, dungan ang pagsiguro sa transparency ug accountability sa mga opisyal nga naggumit sa pondo sa gobyerno.
“Nahimo namo ang pagpagawas sa di-kasarangang gidak-on nga pondo, gumikan sa sayo usab nga pagkapasar sa nasudnong budget karong tuiga. Ang department-focused releases nahimo ilalom sa Agency Budget Matrix ug ang maong pondo nagrepresentar sa mahinungdanong bahin sa 2012 GAA para sa nagakalain-laing programa, aktibidades ug proyekto sa gobyerno,” matod pa ni Abad sa iyang report kang Presidente Benigno Aquino III.
Gihatagan ug punto ni Abad nga ang dakong pondo nga gipagawas ug sayo maghatag ug kahigayonan sa administrasyong Aquino nga mapatuman ang nagkalain-laing proyektong inprastaktura ug paghuman niini sa di pa moabot ang tingulan ug paghapak sa bagyo.
Hangtud niadtong Enero 12, 2012, nakapagawas na ang DBM ug 99.6 porsiento kon 424.6 bilyones sa 426.1 bilyones ka pesos nga pahat alang sa personnel services, samtang 90.4 porsiento usab sa maintenance and other operating expenses ang
napagawas niadtong Enero 4.
“Dugang pa niini, malampuson usab nga napagawas ang 72.1 porsiento kon 150.2 bilyones sa 208.3 bilyones ka pesos alokasyon para sa capital outlays(CO) . Kining maong mga panghitabo sukwahi kaayo sa nasinatian niadtong 2011 diin ang dakong bulto sa alokasyon para sa capital outlay napagawas lamang sa ikaduhang bahin sa tuig,” matod pa ni Abad.
Lakip sa mga CO releases hangtud niining mga petsaha gilangkuban sa Php142-bilyones para sa nagkalain-laing proyektong inprastaktura ilalom sa mga ahensiya sa gobyerno sama sa Department of Public Works and Highways (DPWH), Php91.06-bilyones; Department of Agriculture (DA), Php24.97-bilyones; ug Dept. of Education (DepEd), Php11.06-bilyones.
Lakip sa napagawas sa DBM ang 69.52 bilyones ka pesos nga tipik sa 723.629 bilyones ka pesos nga automatic appropriations hangtud niadtong Enero 15, 2012.
Ang automatic appropriations gamiton aron pondohan ang Internal Revenue Allotments; ibayad sa interes; ug Retirement ug Life Insurance Premiums.
Php82.32 bilyones sa nasudnong budget karong tuiga gigahin para sa big-ticket items nga nagkinahanglan pa ug pagtugot,a lakip na ang Php20.33 bilyones sa Dept. of Health; Php12.43 bilyones sa Dept. of Public Works and Highways; ug Php12.16 bilyones sa Dept. of Transportation and Communication(DOTC).
Ang dakong bulto kon 31.3 porsiento sa nasudnong budget karong tuiga, gigahin alang sa Social Services, Php586.6-bilyones; gisundan sa Economic Services, Php438.8 bilyones (42.4 porsiento); debt services, Php356.1 bilyones (19.6 porsiento); General Public Services, Php338.l bilyones (18.6 porsiento); ug Depensa, Php11.4 bilyones (6.3 porsiento). (ATR/PIA9-Zambo Norte)
