Ni Alma L. Tingcang
PAGADIAN CITY, January 13 - - Gidasig ni Presidente Benigno Aquino III ang mga dagkong stakeholders sa energy sector nga makigtambayayong sa gobyerno sa mga paningkamot aron mapalambo ang implementasyon sa paggamit ug renewable energy. Gihatagan usab niya ug kamahinungdanon sa pagtubag sa dakong problema kalabot sa climate change nga miapekto dili lamang sa Pilipinas kundili sa ubang mga dapit sa kalibotan.
Sa iyang mensahe atol sa “1st Philippine BioEnergy Conference” sa Fiesta Pavilion, Manila Gotel, One Rizal Park didto sa Manila, ang presidente miingon nga ang kalamposan sa pagluwas sa kalibotan nag-agad diha sa panaghiusa sa katawhan gikan sa nagkalain-laing sector sa katilingban aron maseguro ang mas maayong kalikopan nga mapahimuslan sa mosunod nga henerasyon.
“Sa pagtinabangay, mahimo natong mas mahayag ang tuig alang sa kadaghanan sa mga Pilipino, ingon man sa katawhan tibuok kalibotan. Pinaagi sa inyong tabang, makahimo kita pagtukod ug dugang balay nga makapasiga aron pag-abiba sa bag-ong tuig. Pinaagi sa paghatag gibug-aton sa Renewable energy resources, makahimo kita sa atong gamay nga kontribusyon aron masulbad ang dakong problema nga mao ang climate change,” miingon ang presidente.
“Ug kung kitang tanan - gikan sa nagkalain-laing sector ug nasod – magkahiusa ug molampos, makahimo kita pagpahayag dili lamang sa mga balay, makapasiga kita sa paglaum, nga ang katawhan mopuyo ug mabuhi dinhi sa kalibotan sa daghan pang umaabot nga henerasyon,” dugang pahayag sa president.
Nalipay siya sa panagtigum sa mga stakeholders sa maong sector nga nagkahiusa sa paghisgot ug dugang options nga mosangpot sa paggamit ug renewable energy resources sama sa bio-energy nga dako ug benepisyo sa kalikopan ug sa mga katawhan.
Sa pagkakaron, adunay 39% sa energy requirements sa nasod ang gikan sa renewable sources sama sa hydropower, geothermal, solar, wind ug biomass.
Gibana-bana nga ang kontribusyon sa biomass sector mosaka gikan sa 39 megawatts sa enerhiya niadtong 2010, ngadto sa sobra 300 megawatts sa tuig 2015.
Ang presidente miingon nga ang maong pagtaas makahatag usab ug 89,000 dugang trabaho gawas pa nga maawhag ang local nga ekonomiya pagmugna ug dugang opurtunidad alang sa katawhan. (ALT-PIA9/Zambo Sur)
