ni Claro A. Lanipa
Pagadian City, Jan 13 (PIA) – Mokabat sa 90 porsiento kon 1,551 sa 1,713 sa kagamhanang lokal sa tibuok nasud ang nagtuman sa Full Disclosure Policy nga nagmando sa tanang kagamhanang lokal sa pagbutyag sa ilang budget ug ubang financial transactions sa websites, pamantalaan ug ubang dapit sa ilang lugar.
Sa 2011 accomplishment report sa DILG, si Secretary Jesse Robredo mitaho nga taas ang compliance rating sa mga LGUs. Sa 1,551 ka mga LGUs nga mituman, 72 niini mga probinsiya, 132 mga siyudad ug 1,347 mga lungsod.
Dugtong pa ni Robredo nga bisan ang mga barangay nagpakabana sa maong panawagan diin 23,584 sa 42,026 ka mga barangay sa tibuok nasud nagtuman sa maong polisiya.
“Gisagop na karon sa mga kagamhanang lokal ang konsepto sa transparency ug accountability ug nilambigit sa panaw padulong ngadto sa maayong pangagamhanan,” miingon si Robredo
Ang DILG Secretary mitaho usab nga sa 2011, ang iyang departamento mipadayon sa paghatag sa gitawag high premium on local government performance diin suma total sa 1,325 ka mga LGUs ang gihatagan sa Seal of Good Housekeeping tungod sa maayong pagdumala sa ilang tagsa-tagsa nga dapit ug nagtuman sa FDP ug wala’y mansa gikan sa Commission on Audit.
Niining ihap, miingon siya, 351 ka mga LGUs nakadawat sa gitawag Performance Challenge Fund (PCF) nga mikantidad sa P7-milyon alang sa probinsiya, P3-M alang sa siyudad ug P1-M alang sa mga lungsod. Kining insentibo mahimong gamiton nila sa ilang program pagbatok sa kawad-on ug kalamidad. (DILG/PIA9/CAL)
