ni Franklin P. Gumapon
DIPOLOG CITY, Jan. 14 (PIA) - - Gibutyag karong bag-o sa usa ka opisyal sa Department of Environment Natural Resources (DENR) sa rehiyon 9 nga ang National Greening Program (NGP) ni Pangulong Benigno Simeon C. Aquino III kusganong gipatuman sa tibook rehiyon.
Matud pa ni DENR Regional Executive Director Arleigh Adorable, ang tanang field offices sa nasampit nga buhatan mitaho nga adunay 100 percent accomplishment sa pagpatuman sa NGP ni Pangulong Aquino sa tuig 2011.
Ang rehiyonal nga buhatan sa DENR adunay 10 ka Community Environment and Natural Resources Offices (CENROs) ug upat ka Provincial Environment and Natural Resources Offices (PENROs) nga nahimutang sa mga lalawigan sa Zamboanga del Norte, Zamboanga del Sur, Zamboanga Sibugay ug mga dakbayan sa Dapitan, Dipolog, Pagadian, Zamboanga ug Isabela sa lalawigan sa Basilan.
Dugang saysay ni Adorable nga ang 100 percent accomplishment sa NGP makita sa 2,402,000 ka mga seedlings nga natanum sa may 4,804 ka ektaryang forest lands ug urban areas sa tibook rehiyon.
Ang mga matang sa kahoy nga gipangtanum gilangkoban sa forest trees, fruit trees ug rubber trees ubos sa pag-atiman sa nagkalain-laing people’s organization.
Ang NGP maoy usa ka hiniusang kampanya sa kagamhanan alang sa pagpabalik sa kalunhaw nga kinaiyahan pinaagi sa pagpananum sa kahoy ubos sa pagdumala sa DENR uban sa pagpakigtambayayong sa mga buhatan sa Department of Agriculture (DA) ug Department of Agrarian Reform (DAR) pinasikad sa usa ka Executive Order nga gipagawas ni Pangulong Aquino nga nagtinguha sa pagpananum sa 1.5 milyones ka punu-an sa kahoy sa 1.5 milyones ka ektaryang luna sa tibook nasud.
Tumong sa NGP mao ang paghatag ug seguridad sa kita sa katawhan, tudlo-an ang matag-usa sa pag-amping sa kinaiyahan ug pagpalambo sa ekonomikanhong kalihukan sa tibook kapupud-an. (FPG/PIA-Zamboanga del Norte)
