ni Franklin P. Gumapon
DIPOLOG CITY, Jan. 18 (PIA) - - Nanumpa sa ilang katungdanan ang mga bag-ong natudlong membro sa kabinete ni caretaker-Governor Mujiv Hataman sa Autonomous Region in Muslim Mindanao (ARMM) karong bag-o.
Si Hataman nga maoy nagpa-panumpa sa mga bag-ong membro sa kabinete nagkanayon nga silang tanan kwalipikado ug gi-ayu pagpili sa wala pa sila gitudlo sa ilang tagsa-tagsa ka katungdanan.
Dugang pa ni Hataman nga ang maong mga membro sa iyang kabinete nag-represent sa mga nagkalain-laing tribu sa naasoy’ng rehiyon.
Ang mga natudlong membro sa kabinete sa ARMM gilangkoban nila ni Atty. Jamar Kulayan sa Department of Education (DepED), Forester Kahal Kedtag sa Department of Environment and Natural Resource (DENR), Marites Maguindra sa Department of Trade and Industry (DTI), Prof. Sangkula Tindick sa Department of Agriculture and Fisheries (DAF), Halim Mohammad sa Department of Agrarian Reform (DAR), Dr. Kadil Sinolinding Jr. sa Department of Health (DOH), Haroun Lucman Jr. sa Department of Interior and Local Government (DILG), Muslimin Jakilan sa Deparftment of Labor and Employment (DOLE) ug si Engr. Emil Sadain sa Department of Public Works and Highways (DPWH).
Natudlo usab isip bag-ong cabinet secretary si Norkaila Mambuay-Campong ug Atty. Abdulmuin Pakang isip solicitor-general.
Gibutyag usab ni Hataman nga wala pay natudlo alang sa mga buhatan sa Department of Transportation and Communication (DOTC), Department of Science and Technology (DOST) and Department of Tourism (DOT).
Matud pa ni Hataman nga ang mga bag-ong membro sa iyang kabinete subayon ug susihon pag-ayu ang ilang performance sulod sa 100 ka adlaw gikan sa ilang pagka-tudlo sa posisyon subay sa reformed transitional government agenda nga gitinguha ni Presidente Benigno C. Aquino III kinsa mitudlo kaniya isip officer-in-charge sa ARMM.
Sa ilang kabahin, ang mga bag-ong membro sa kabinete misaad nga sa kanunay ilang batunan ang transparency sa tanang tansactions ug abli ngadto sa media ang ilang buihatan sa tanang higayon.
Ang ARMM gilangkoban sa mga dakbayan sa Marawi ug Lamitan ug mga lalawigan sa Maguindanao, Lanao del Sur, Tawi-Tawi, Sulu ug Basilan. (FPG/PIA-Zamboanga del Norte)
