Ni Alma L. Tingcang
| PAGADIAN CITY, January 18 - - Ang Department of Foreign Affairs (DFA) mitaho nga ang 296 Pinoy crew nga sakay sa M/V Costa Concordia luwas na, nailhan na, ug gitakdang ipalalin sa nasod. Costa Crociere S.p.A., ang kompanya nga maoy tag-iya sa nasangpit nga cruise ship nag-organisa ug mga flights aron pagpalalin sa mga crew members sugod kagahapong adlawa, Enero 17. Ang maong kompanya naghatag sa opisyal nga talaan sa mga Pinoy crew members ngadto sa Philippine Embassy sa Emergency Response Team didto sa Roma. Mihatag kini ug kasegurohan ngadto sa team nga hatagan sa hustong bayad, ilisan ang mga nawala nilang butang, kuwarta ingon man mag-isyu ug pormal nga sulat nga magdetalye sa commitment sa nasangpit nga kompanya. Nagsugod na usab ang Emergency Response Team sa embahada sa paghatag ug travel documents ngadto sa mga Pinoy didto sa La Fattoria, Granduca ug Terme Hotel sa Grosetto aron pagpasayon sa ilang pagpalalin balik sa Pilipinas. Ang tanang travel documents lakip na ang mga hulagway sa mga Pinoy gihatag nga libre sa embassy team. Samtang tulo ka mga Pinoy ang gikatahong anaa sa ospital sa Grosetto tungod sa mga samad ug bun-og tungod sa pagkahulog gikan sa mga higdaanan sa barko. Una niini, pagdawat sa taho nga adunay cruise ship nga nasangyad didto sa baybay sa Grosetto, Tuscany, Italy niadtong nakalabay nga Biyernes, si Ambassador Virgilio A. Reyes Jr. hinanaling nag-dispatch ug embassy emergency response team pinanguluhan ni Consul general Grace Cruz-Fabella aron pagtabang sa mga Pinoy nga nakasakay sa nasangpit nga cruise ship. Lakip sa response team, gi-activate usab ang nerve center for operations sa embahada sa Roma aron pag-coordinate sa tanang lihok sa response team ingon man ang feedback gikan sa mga opisyales sa Costa Concordia ug ubang ahensiya aron maseguro ang tukma nga paghatag ug impormasyon/update ngadto sa DFA. (ALT-PIA9/Zambo Sur) |
