Ni Alma L. Tingcang
| PAGADIAN CITY, January 18 - - Ang Clark Development Corporation (CDC) mipahibalo nga ang bili sa exports sulod ning nasangpit nga freeport alang sa 2011 milapas sa US$2 bilyon nga marka, mas sayo ug tulo ka tuig kaysa target date nga gitakda sa nasangpit nga kompanya nga gipanag-iya sa gobyerno. Si CDC President Felipe Antonio B. Remollo miingon nga bisan pa sa nagkaluya nga exports sa nasod tungod sa ekonomikanhong krisis niadtong milabay nga tuig 2011, ang mga nakabase sa Clark nga negosyo naka-export ug mokabat sa kantidad nga US$2.258 bilyon gikan Enero hangtod Disyembre 2011. Kung ikumpara sa 2010 exports nga US$1.453 bilyon, ang maong kantidad mas taas ug 55 porsiyento. Matod pa, ang US$1.573 bilyon exports gikan sa electronic sector sa Clark dako ug gikatabang sa maong pag-uswag. Gisundan kini sa tire exports diha sa US$298 milyon ug garments sa US$226 milyon. Samtang ang mga manufacturing firms nakahatag ug US$131 milyon ug ang aviation-related nga kompanya mikumpleto sa nag-unang lima ka exporting sector diha sa US$13 milyon. “Ang export performance sa nasod dili kaayo makaguol tungod kay ang exports sa Clark Freeport Zone milapas sa US$2 bilyon nga marka, mas sayo ug tulo ka tuig kaysa target date nga gitakda sa CDC,” si Remollo miingon. Ang 2011 record export volume mipahiluna sa CDC sa saktong dalan aron pagkab-ot sa nag-unang tulo ka performance targets nga gitawag ug “3-2-1 development roadmap” alang sa Clark diin ang US$2 bilyon alang kini sa exports, samtang 100,000 trabaho nga kinahanglan makab-ot sa maong kompanya sa gobyerno sa tuig 2014. “Pinaagi ning maong mga kalamboan sa exports sector, ang mga kasamtangang lakaw sa panahon nagpakita nga ang mga targets makab-ot sa mas sayo nga panahon,” si Remollo miingon. (ALT-PIA9/Zambo Sur) |
