ni Alfonso T. Ruda
DIPOLOG CITY, MAY
10(PIA)--- Gipasalig
ni Presidential Adviser on the Peace Process Secretary Teresita Deles ngadto sa
mga membro sa civil society organizations (CSO), diin kadaghanan kanila membro
usab sa Indigenous Peoples Communities nga panalipdan ang katungod sa mga IPs sa
nagpadayong negosasyon sa kalinaw.
Di
pa lang dugay, gikonsulta ni Deles ang mga representante sa CSO sa nagpadayong
sinultihay ug mihatag ug kalambuan sa dagan sa negosasyon. Kauban ni Deles ang
mga membro sa mga negosyador sa gobyerno nga nakigsultihanay uban sa Moro
Islamic Liberation Front (MILF) nga si Senen Bacani ug Jurgette Honculada, nga
kauban usab sa grupo nga nakigsabot uban sa Communist Part of the Philippines-New
People’s Army-National Democratic Front-Communist Part of the Philippines(CPP-NPA-NDF).
Ang
konsultasyon nga gipahigayon didto sa Regalla Tower Suites sa Cubao, Quezon
City maoy usa sa mga kalihokan nga gihimo sa gobyerno aron ipakita ang kaklaro
ug paglambigit sa katawhan, ingon makuha usab ang ilang panglantaw kon unsaon
nga mapadas-og ang negosasyon.
Ang
maong konsultasyon gitambungan sa mga membro sa mga CSO sa nagkalain-laing
rehiyon sa nasod, diin ang uban milupad pa gikan dinhi sa Mindanao.
Lakip
sa nahisgutan mao ang katungod sa mga IPs nga posibling maapektuhan sa higayong
mapalig-on na ang kasabutan sa kalinaw tali sa gobyerno ug MILF.
Sa
maong miting, gihatagan ug punto ni Deles, nga ang negosasyon sa kalinaw dili
matapos bisan ug mapirmahan na ang kasabutan sa kalinaw, tungod kay ang kasabutan
dili man maoy mag-implementar, kundili kinahanglan pang magpasar ug balaod may
kalabutan niini alang sa hingpit nga impolementasyon sa mapalig-ong kasabutan.
“Ang
kasabutan sa kalinaw dili usa ka “magic wand” nga mosulbad sa atong problema,
kundili maghatag lang kini ug panahon ug luna aron mahilom ang boto-boto sa
armas ug matrabaho ang usa ka ugma pinaagi sa mahimsog nga debate,” panapos pa
ni Honculada. (ATR/OPAPP/PIA9-Zambo
Norte)
