Ni Alma L. Tingcang
MANILA, May 14 - - Ang Malacanang subling nanawagan sa mga
Filipino nga motuman sa ilang tahas nga mapugngan ang pagkuyanap sa dengue
virus pinaagi sa pagpabiling limpyo sa ilang palibot ug luwas sa mga nagpondong
tubig, usa sa nag-unang breeding source sa mga lamok nga nagdala sa maong virus.
Sa usa ka press briefing nga nabati diha sa DZRB Radyo ng
Bayan kagahapon, si Deputy Presidential Spokesperson Abigail Valte miingon nga kinahanglan mahimong responsable ang
mga Pinoy sa pagpanglimpyo diha sa ilang palibot tibuok tuig.
Matod pa ni Valte nga ang dengue motakboy dili lamang sa
panahon sa ting-ulan kundili ingon man usab sa panahon sa summer nga init kaayo
ang atong palibot.
“Bisan init ang panahon nga atong nasinati karon,
kinahanglan padayon ang atong pagpangandam aron malikayan ang dengue. Hinaot
nga ipadayon nato ang pagpanglimpyo sa atong mga tugkaran ug palibot tungod kay
magsugod kana sa atong kaugalingon,” si Valte miingon.
Dugang pahayag niya nga ang Department of Health busy kaayo sa
pakig-koordinasyon sa kampanya batok dengue diha sa mga local health units,
labi na sa Zamboanga City diin usa ka dengue outbreak ang gikataho.
“Nakigtambayayong karon ang Department of Health sa local
health unit didto aron mapugngan ang pagkuyanap
sa ilang gitawag nga dengue outbreak,” si Valte miingon.
“Dili lang man gud kaysa ting-ulan lamang kita delikado sa
dengue. Bisan pa ting-init, kinahanglan padayon kitang mangandam ug
siguradohong luwas ang atong palibot ug dili kini mapuy-an sa mga lamok nga
nagdala sa dengue virus,” dugang pahayag ni Valte. (ALT-PCOO/PIA9-Zambo Sur)
