ni
Franklin P. Gumapon
DIPOLOG CITY, May 19 (PIA) - - Subling gipasalig ni Pangulong Benigno
Simeon C. Aquino III karong bag-o nga ang pagpatuman ug mga kausaban sa
edukasyon maoy nag-una sa iyang mga prayoridad arun makab-ot ang maayong
edukasyon alang sa mga katawhan sa nasud.
Tinguha sa Pangulo nasud nga ang mga tinun-an makakita dayun ug trabaho
human sila makatapos sa ilang pagtungha.
Sa iyang mensahe atol sa ika-18 nga kasumaran sa pagka-himugso sa
Commission on Higher Education (CHED) didto sa buhatan niini sa dakbayan sa
Quezon kaniadtong Huwebes, iyang gipasalig nga ang kagamhanan padayon nga
mogahin ug dugang pundo arun mapatuman ang mga kausaban sa edukasyon, ug arun
mapalambo ang mga imprastraktura ug mga pasilidad lakip na ang suholan sa mga
magtutudlo.
Usa sa ka tataw nga kamatuoran sa gihimong pag-atiman sa kagamhanan sa
edukasyon mao ang padayung pagtaas sa pahat niini matag tuig sukad siya
milingkod isip pangulo nasud.
Migahin ang kagamhanang Aquino ug P175 bilyones kaniadtong 2010, P207.3
bilyones sa 2011 ug 238.8 bilyones sa 2012.
Gipahibalo usab sa Presidente nga sugdan karong tuiga ang pagpatuman sa K
to 12 basic education program nga nagmando sa mga tinun-an nga mokuha ug usa ka
tuig sa kindergarten ug dugang duha ka tuig sa high school arun andam sila nga
mangita’g trabaho human sa ilang gradwasyon.
Gipahibalo usab ni Pangulong Aquino ang P4.2 bilyones nga supplemental
budget alang sa mga state universities and colleges arun pagpalambo sa ilang
paghatag ug edukasyon sa mga kabataan. (FPG/PCOO/PIA-Zamboanga del Norte)
