Aquino nakigpulong sa MRDP People's Organization Congress sa dakbayan sa Davao

Ni Gideon C. Corgue

PAGADIAN CITY, May 14 (PIA) – si Presidente Benigno S. Aquino III mihatag kaseguruhan sa katawhang Filipino sa nagpadayon nga paningkamot sa kagamhanan pagpatuman sa mga reporma  ug naghatag kagahum nila pagsalmot sa mga malamboong kalihokan nga maoy makapauswag sa kahimtang sa pamuyo ug mopalambo sa malahutayong kauswagan.


Sa iyang pakigpulong atol sa Mindanao Rural Development Program 2 (MRDP2) People’s Organizations Congress sa Grand Ballroom sa Grand Regal Hotel ning Lunes, ang Presidente mipadayag sa iyang tinguha paghatag kabilin sa nagbag-o nga nasud sa katawhang Filipino.


“Atong ipalig-on ang reporma tungod kay nakabalo kita nga aduna pa kitay ikapakita. Dili pwede ang 'puwede na,' ug dili ensakto ang batasan nga 'bahala na.' Hinoon atong ipadaplin ang interes sa kadaghanan, atong wad-on ang hunahuna nga pangkauglaingon hinoon atong hatagan ug kusog ang katawhan nga mosalmot pagpapalambo sa nasud,” matud pa sa Presidente.


“Akong pangandoy nga ikabilin ang usa ka bag-o nga Pilipinas sa sunod nga henerasyon. Bug-os nga ako kini nga tumanon tungod kay daghan kita nga mga kaabag sa matarong nga dalan kauban ang People’s Organizations, padayon pa kita nga modala sa kahayag sa paglaum ug mauswagon nga kaugmaon sa bisan asang parte sa Pilipinas,” dugtong pa niya.


Ang hepe ehekutibo mipahibalo sa mga epeketo sa dalaygon nga mga proyekto sama sa MRDP pagkab-ot sa mga inisyatibo sa kagamhanan pagtanyag ug tukma nga pagkaon ug pagpauswag sa abot sa katawhan.


“Pinaagi sa MRDP, adunay kaabag ang atong gobyerno sa paghatag kaayuhan sa atong mga katagi-lungsod nato sa Mindanao,” matud pa ni Presidente Aquino.


“Dili tiawtiaw ang dako sa kalampusan sa atong panag-uban. Akong nahibaloan nga mitaas ang abot sa atong mga katawhan sa napulo’g pito ka porsiyento gikan nagsugod ang programa. Dul-an kini sa usa ka gatos libo ka pesos sa dugang abot matag-tuig,” dugtong pa niya.


Si Presidente Aquino ang mipahibalo usab sa paggamit sa atong pinakabag-o nga teknolohiya nga nagseguro nga ang pundo ang gidapat sa makita nga mga proyekto nga mosilbi sa katawhang Filipino.