Aquino mipasalig ug padayong suporta sa gobyerno ngadto sa mga tag-iya ug sari-sari stores

ni Alfonso T. Ruda

DIPOLOG CITY, MAY 17(PIA)---Gipasalig ni Presidente Benigno Aquino ngadto sa mga tag-iya ug sari-sari stores, micro, small ug medium enterprise advocates ug mga entrepeneurs ang padayong suporta sa gobyerno sa ilang pagpaningkamot nga epektibong mapadagan ang ilang tagsa-tagsa ka patigayon.

Sa iyang pagpakigpulong sa 7^th Tindahan ni Aling Puring Sari-Sari Store Convention nga gipahigayon didto sa World Trade Center sa Pasay City niadtong Miyerkules, giingnan ni Presidente Aquino ang mga partisipantes nga ila nang maihap ang gobyerno nga ilang katambayayong pagpalambo sa ilang kinabuhi.  

Dungan niini, ang Presidente miingon nga giluagan na karon sa gobyerno ang mga rekisitos nga gikinahanglan pagpabarog ug gagmayng negosyo.

Gihatagan ug punto ni Presidente Aquino nga ang na-andang praktis nga pag-adto sa nagkalain-laing buhatan aron pagkuha sa mga gikinahanglang dokumento para marehistro ang usa ka negosyo gihimo na karong sayon pinaagi sa Philippine Business Registry ug Business Name Registration System.

”Kon kaniadto, kulang na lang magsirko-balintong ka padulong sa usa ka opisina sa nagkalain-aling bahin sa lungsod aron lang makakuha ug mga papeles sama sa Pag-ibig, ug SSS. Imbis nga ang gobyerno niadtong una motabang kanato, sama pa man hinuon nga sila ang naghatag kanato ug purwisyo. Karon napadali nato ang proseso para ang pagparehistro sa negosyo pinaagi sa Philippine Business Registry ug Business Name Registration System,” ang Presidente nagkanayon.

Midugang pa ang Presidente nga padayon na karong gi-finetune ang simpling gimbuhaton pagkuha ug business permit aron labi pa kining mahimong masayon.

Karon, duna sab kitay SME Caravans nga naglibot sa nagkalain-laing rehiyon sa nasod aron mangdani sa atong mga kaigsoonan nga magnegosyo o kaha mopalambo sa ilang kasamtangang negosyo. Sa kamatuoran, niadtong Abril 2011, miabot na sa 24 ka nagkalain-laing llugar sa nasod ang naabtan sa maong caravan. Halos 18 mil na ka mga Filipino ang nakighiusa kanato niini,” matod pa ni Presidente Aquino.

Matod pa ni Presidente Aquino, ang pagluag sa mga rekisitos pagbutang ug patigayon dinhi sa nasod namatikdan na sa tibuok kalibutan ug naghatag kini ug kompiyansa sa mga negosyante sa kalibutanong komunidad nga magbutang ug negosyo dinhi sa PIlipinas.

Bisan ang atong nasod, nakabati na usab sa kausaban sa Pilipinas. Gumikan sa maayong pagdumala sa gobyerno, padayong mitaas ang kompiyansa sa mga negosyante, ma-lokal man o langyaw  nga mamuhunan dinhi sa atong nasod,” nagkanayon ang Presidente.

Alayon niini, gi-awhag ni Presidente Aquino ang tanang mga Filipino nga hatagan ug katumanan ang damgo sa ilang kaugalingon pinaagi sa pag-invest sa ilang katakos ug bahandi aron mahimong negosyante ug kapitalista.

“Ang damgo magsugod man sa ginagmay, mahimo gihapon kining matuman kon ubanan sa kadasig ug pagpaningkamot. Tabangan nato pagpalambo ang atong nasod padulong sa mas mahayag ug malambuong ugma,” ang Presidente miingon. (ATR/PCOO/PIA9-Zambo Norte)