ni Alfonso T. Ruda
DIPOLOG CITY, APR. 12(PIA)---Nanawagan karon si Presidente Benigno Aquino III sa katawhang Filipinhon nga makig-uban sa pagpaningkamot sa gobyerno nga mapatuman ang halapad nga reporma sa hudikatura, uban ang pag-ingon nga katungdanan sa tanang Filipinhon ang pagsiguro sa usa ka makiangayon ug gawasnong katilingban para sa sunod nga henerasyon.
Ang Presidente mipalanog sa panawagan sa iyang pagpakigpulong human nga gipasidunggan ug Doctor of Law degree, Honoris Causa didto sa Centro Escolar niadtong Miyerkules.
Matod pa ni Presidente Aquino, panahon na karon nga mausab ang kanhing imahen sa hudikatura nga nailang pabor sa mga adunahan, hinay sa pagdungog ug pagresulba ug mga kaso, ingon man kakulang sa kamatinud-anon sa mga kawani pagtuman sa ilang katrungdanan.
“Kini mismong mga butanga ang gusto natong bag-ohon. Usa ka halapad nga reporma ang gusto natong mahitabo dili lamang sa ka-yaya sa hawanan sa mga hukmanan sa nasod, kundili hangtud na sa pangutukan sa matag empleyado sa hudikatura gikan sa mga huwes, mga abogado, ug sa mga Clerk of Court sa pagtuman sa ilang katungdanan,” matod pa ni Presidente Aquino.
“Gusto lang natong masiguro nga kon dunay magpasaka ug kaso, nagpuyo man kini sa balay nga bato o sa barung-barong, makadawat siya sa disisyon sulod sa duha ka tuig ug ang timbangan sa katarungan mopabor lamang sa kamatuoran,” midugang pa ang Presidente.
Ang Presidente miingon nga katungdanan sa matag Filipino nga magtrabaho padulong sa kasigurohan nga maangkon ang hudikatura nga mopakanaog ug patas ug makiangayong disisyon.
“Katungdanan natong tanan nga mobarog sa sistemang pangkatarungan nga dunay kasigurohan---usa ka hukmanan diin ang inosente mogawas nga inosente ug ang mga nakalapas sa balaod nga manubag sa ilang nahimong kasal-anan,” matod pa ni Presidente Aquino.
“Anaa kanato isip mga lungsoranon nga mahimong sistemang makatarungan ang sistemang pangkatarungan sa nasod,” nagkanayon ang Presidente.
Nanawagan usab ang Pamuno Nasod sa tanang mga Filipinhon nga ubanan siya sa pagpaningkamot nga makab-ot ang usa ka maki-angayon ug gawasnong katilingban para sa sunod nga henerasyon sa mga Filipijno.
“Ubani ko ninyo. Mobarog kita ug mosalmot alang sa pagkab-ot sa matuod nga hustisya sa atong katilingban, aron masiguro ang makatarunganong Pilipinas nga atong mapapanunod sa mosunod natong mga kadugo,” panapos pa sa Presidente.(ATR/PCOO/PIA9-Zambo Norte)
