ni Alfonso T. Ruda
DIPOLOG CITY,APR. 12(PIA)---Uban ang pagtunol ug pahasubo sa pamilya sa mga tripulanteng Filipino nga napatay sa gihimong rescue operation didto sa Iran human nga ang ilang gisakyang barko gi-hijack sa mga piratang Somali didto sa kadagatan sa India niadtong miaging bulan, misaad usab ang Malakanyang nga motunol ug hinabang ngadto sa pamilya sa mga biktima.
“Mitunol kami sa among pahasubo sa pamilya sa 2 ka Filipino nga napatay sa gihimong rescue operation. Apan sa among pagsabot, dunay hinabang nga ihatag ngadto kanila. Busa nagpasalamat kami nga naluwas ang mga tripulanteng Pinoy,” matod pa ni Lacierda.
Sumala pa sa Departamento sa Kalihokang Langyaw, ang mga biktima maoy lakip sa 10 ka mga Filipinong tripulante sa M/V Eglantine nga gi-hijack sa mga piratang Somali. Ang Englantine nga gipanag-iya ug Iranian gi-hijack sa mga piratang Somali sa kadagatan sa India niadtong Marso 26.
Sumala pa sa DFA, ang mga tripulante sa barko mao ang gihimong taming sa mga pirate dihang naglusad ug rescue operation ang Iranian Navy.
Bisan ug naluwas ang 8 ka mga tripulanteng Pinoy gikan sa mga mibihag kanila, duha sa napulo ang namatay- ang usa gumikan sa igo sa bala sa iyang ulo, samtang ang usa namatay gumikan sa “suffocation” didto sa engine room.
Hinuon, nadakpan sa Iranian Commandos ang 12 ka piratang Somali nga mi-hijack sa higanteng barko.
Ang naluwas nga mga tripulanteng Pinoy nahibalik na sa nasod kagahapon(Abril 11), samtang ang pagdala nganhi sa Pilipinas sa patayng lawas duha ka namatay nga tripulante, gihikay pa sa Embahada sa Pilipinas didto sa Iran, matod pa sa DFA.
Misaad usab ang kompaniya sa barkong ilang gitrabahoan ug supisyenteng bayad pinansyal ngadto sa pamilya sa napatay nga mga tripulante, dugang pa sa DFA. (ATR/PCOO/PIA9-Zambo Norte)
