ni Alfonso T. Ruda
DIPOLOG CITY, APR.
26(PIA)---Si
Presidente Benigno Aquino III misaad nga tubagon ang nagakadakong panginahanglan
sa enerhiya sa nasod, apan iyang gihatagan ug punto ang pagkab-ot sa labing
maayong solusyon human ang halapad nga konsultasyong ipahigayon uban sa mga
nagkalain-laing “stakeholders.”
Sa
paglusad sa librong People Power Volunteers for Reform, usa ka volunteer ang miapela
kang Presidente Aquino nga dili tugtan ang pagpabarog ug coal-fired power plant
sa Subic, Zambales gumikan sa dili maayong epekto niini sa palibot.
Matod
pa sa Presidente, halapad nga konsultasyon una ang pagahimoon sa dili magdisisyon
ang gobyerno sa labing maayong solusyon sa problema sa enerhiya sa nasod ug ang
labing maayong paagi pagprodyus ug enerhiya.
Dunay
hugtanong pagsupak sa pagpabarog ug coal-fired power plants ingon man pagpabarog
ug mga gas plants sa nasod. Samtang sa laing bahin, ang bag-o ug mas limpiyong
paagi pagprodyus ug enerhiya, mahal usab kayo, matod pa sa Presidente. Maoy gihisgutan sa Presidente ang solar
energy ug ocean tidal wave. Ang kakulang sa tubig gumikan sa nag-usab-usab nga
klima nahimo na usab nga problema sa pagpadagan sa mga hydro-powered plants,
matod pa niya.
“Dili
ako mokomento partikularmente sa Subic coal plant. Basta sa katapusan sa adlaw
duna kitay nagakadakong populasyon. Ang mga manufacturers namalik na---tanan
nagkinahanglan ug kuryente ug kinahanglang magprodyus kita niini. Kining tanan
atong himoon pinaagi sa pagpakikonsultasyon
sa katawhan,” matod pa ni Presidente Aquino.
Gipatin-aw
ni Presidente Aquino nga ang Subic dili lang usa ka lugar alang sa mga turista
kundili locator site usab kini para sa mga manufacturing companies.
Gihatagan
ug punto sa Presidente nga ang pagbutang ug planta sa enerhiya sa Pampanga, Tarlac
o Bataan himoon lamang human makuha ang pulso sa katawhan.
Paningkamutan
natong makab-ot ang labing maayong solusyon. Apan sa katapusan sa adlaw, kinahanglan
gyong makakita ug labing maayong solusyon matod pa sa Presidente.(ATR/PCOO/PIA9-Zambo Norte)
