ni Alfonso T. Ruda
DIPOLOG CITY, APR. 14(PIA)--- Subling gisiguro ni Presidente Benigno Aquino III nga determinado ang gobyerno nga tubagon ang problema sa enerhiya sa Mindanao pinaagi sa nagkalain-laing inisyatibo nga gilangkuban sa rehabilitasyon sa pila-na-ka-dekadang planta sa enerhiya ug pagmugna ug power monitoring committee nga pagalangkuban sa nag-unang mga stakeholders sa sektor.
“Ang akong damgo nga si di pa ako mokanaog sa puwesto karong 2016, kining sitwasyon sa enerhiya sa Mindanao dili na mahimong problema sa mga mamumuhunan ug sa mga lumulupyo sa Mindanao…nga nianang panahona, mapasigarbohon na akong moingon nga gibiyaan ko kamo nga naa sa maayong mga kamot,” matod pa ni Presidente Aquino sa iyang pagpakigpulong sa gipahigayong Energy Summit sa Mindanao didto sa dakbayan sa Davao kagahapon.
Gibutyag ni Presidente Aquino ang pipila ka mga gikinahanglang lakang aron motubag ang panginahanglan sa enerhiya sa Mindanao.
“Naggahin kita ug 2.6 bilyones ka pesos alang sa “large-scale rehabilitation sa Agus 6 nga napasagdan na sulod sa 59 ka tuig. Kining maong planta gidesinyo nga mo-operate lamang sulod sa 30 ka tuig apan napahimuslan kini nato sa halos doble nga gidugayon,” matod pa sa Presidente.
“Kining maong rehabilitasyon dapat nga gihimo kaniadto pa… nagasto usab kita para sa rehabilitasyon sa Agus 2. Dili lang nato mapabalik kining maong planta sa iya kanhing kapabilidad kundili mas mapanindot pa nato kini gamit ang modernong teknolohiya. Gumikan niini, kining maong mga planta makaprodyus pa ug dugang 79 ka megawatt,” matod pa ni Presidente Aquino.
Gibutyag usab ni Presidente Aquino nga gi-aprobahan na sa National Economic Development Authority(NEDA) sa Integrated Natural Resources Environmental Management Program ang paggahin ug 7.24 bilyones ka pesos alang sa upat ka river basins – ang duha niini ania sa Mindanao nga magpabuhagay na usab ug tubig.
Sumala pa sa Hepe Ehikutibo, gikonsidera karon sa gobyerno ang pagmugna sa Power Monitoring Committee nga tahasan pagdumala sa pag-presyo sa enerhiya sa rehiyon.
“Ato karong gitun-an ang pagpabarog sa Mindanao Power Monitoring Committee nga pagapanguluhan sa Mindanao Development Authority (MDA) ug mga representante sa Department of Energy, National Grid Corporation of the Philippines ug pipila gikan sa civil-society, mga kooperatiba sa kuryente ug sektor sa patigayon,” matod pa ni Presidente Aquino.
Matod pa sa Presidente, gilantaw karon sa gobyerno ang solusyon sa problema sa enerhiya sa Mindanao nga makabenepisyo sa umaabot pang mga henerayson.
“Sa makadaghang higayon ako miingon ug moingon na usab ako karon nga ang Mindanao dili na mahimong Yuta sa mga Saad kundili Yuta sa Natumang mga Saad. Mao nga nia ako karon, dili lamang aron ipakita nga seryoso kita sa paghatag ug solusyon sa problemang inyong giatubang apan labaw sa tanan dili lamang nato malampasan kining maong problema sa mosunod nga duha ka tuig, gusto pa gayod nato nga mahimo kamo nga haligi sa atong ekonomiya sa umaabot nga mga dekada,” ang Presidente nagkanayon.
Lakip sa mitambong sa gipahigayong Energy Summit mao sila si Presidential Communications Operation Secretary Herminio Colomma; Transportation and Communication Sec. Mar Roxas; Energy Sec. Jose Rene Almendras ug Labor Sec. Rosalinda Baldoz, ingon man sila si Senador Teofisto Guingona III ug Aquilino Pimentel III ug mga membro sa Ubos Balay-Balaoranan.
Ang Energy Summit gipahigayon aron hatagan ug kahigayonan ang tanang hingtungdan nga makapresentar sa ilang tagsa-tagsa ka mga problema ug rekomendasyon.(ATR/PCOO/PIA9-Zambo Norte)
