Ni Alma L. Tingcang
PAGADIAN CITY, March 23 - - - Gipahayag sa Malacanang nga ang kinaulahiang Pulse Asia Survey diin nagpakita nga 70 porsiyento sa mga Pilipino nagpabiling misalig sa pamunoan ni Presidente Benigno Aquino III “usa ka indikasyon sa ilang suporta sa iyang pakigbisog batok sa korupsiyon ug kawad-on.”
Sa usa ka pahayag nga gibasa atol sa regular press briefing sa Malacanang, si Presidential Spokesperson Edwin Lacierda miingon nga ang maong survey tataw kaayong nagpakita nga ang mga benepisyo sa reporma nga gi-implementar sa administrasyong Aquino nabatian na sa katawhan.
“Sa amo nang gikaingon, public office is a public trust. Walay mas labaw nga ebidensiya nga ang publiko mibati na sa epekto sa reporma kaysa nagpadayong trust ug satisfaction ratings sa presidente,” si Lacierda miingon.
Matod pa nga ang presidente nagpabiling mituman sa iyang panaad aron pagkab-ot sa adbokasya nga iyang gilatid sa iyang pagkampanya: pagpalambo sa panginabuhi sa mga Pilipino.
“Gidawat namo kining maong resulta isip dugang nga kalig-onan aron pagduso sa repormang ekonomiya ug katukoran ngadto na sa inclusive ug equitable growth, nagpasabot nga kitang tanan makabenepisyo ug makatarunganon nga paglambo,” matod pa ni Lacierda.
Ang nasangpit nga survey nga gipahigayon niadtong Pebrero 26 ngadto sa Marso 9, 2012 base sa sample nga 1,200 hingkod ug pangedaron, 18 ngadto na pataas, nagpakita nga ang trabaho ni Presidente Aquino III (70%), Vice President Binay (84%) ug Senate President Juan Ponce Enrile (71%), gikalipay sa kadaghanan sa mga Pilipino. (ALT/PIA9-Zambo Sur)
