DIPOLOG CITY, MARCH 23(PIA)---Ang nagpadayong sinultihay tali sa Kagamahanan sa Pilipinas ug Moro Islamic Liberation maoy usa ka positibong indikasyon nga malaumon ang duha ka partido nga mapalig-on ang kasabutan sa kalinaw sa nagpadayong negosasyon.
Apan ang nagbantay sa formal exploratory talks nakamatikod nga hinay kaayo ang dagan sa negosasyon ug nabalaka kini nga basig mapunta na usab kini sa wala kon stalemate.
Apan sa gipahigayong press briefing sa Malakanyang, gipahayag sa tigpamaba sa palasyo nga si Edwin Lacierda nga samtang tinuod nga dunay problema sa sinultihay, ang importante nga wala mobiya ang duha ka partido sa lamesa sa negosasyon.
“Áng kamatuoran nga ang duha ka partido padayong nagsultianay, maoy usa ka maanindot nga timailhan nga malaumon ang duha ka partido nga makab-ot ra ang kasabutan sa kallinaw,” matod pa ni Lacierda.
Sa pagsugod sa ikaduhang adlaw sa ika-26 nga formal exploratory talks, ang Hepe sa mga negosyador sa gobyerno nga si Marvic Leonen miingon nga bisan pa man sa mga problemang nasinatian, padayon pa gihapong miirog ang negosasyon.
Ang pahayag ni Leonen maoy mihupay sa mga kabalaka nga posibling mapunta sa stalemate ang negosasyon gumikan sa malig-ong baruganan sa tagsa-tagsa ka partido sa mga mahinungdanong isyo.
Matod pa ni Leonen, gituki sa duha ka partido ang mga mahinungdanong isyo, nagtoon niini ug maayo ngadto sa kina-uyokan sa negosasyon ug mihulgway niini nga usa ka “hard bargaining” sa lamesa.
Uban niini, nanawagan ang Hepe sa mga negosyador sa gobyerno ngadto sa MILF nga makitignabangay sa gobyerno diha sa pag-analisar sa mga katarungan ug baruganan ug paglantaw sa “political viability” uban ang pag-ingon nga dunay mga lakang nga mas tukma ug angayang himoon kay sa pagpabilin ug barog sa mga naka-ukit nga posisyon.(ATR/PCOO/PIA9-Zambo Norte)
