Ni Alma L. Tingcang
PAGADIAN CITY, March 30 - - -Si Executive Secretary Paquito N. Ochoa nanawagan sa Department of Justice (DOJ), Prosecutors’ League of the Philippines (PLP) ug sa National Prosecution Service (NPS) nga motuman sa ilang tahas sa pagdasig ug kumpiyansa tali sa mga negosyante, nga gusto makabawi sa ilang pamuhunan ug mangita’g kasegurohan sa ilang katawhan ug propriyedad.
Sa iyang pakigpulong atol sa 24th National Convention sa Prosecutors’ League of the Philippines nga adunay temang, “Meeting the Challenges of Global Crime” didto sa Manila Hotel kagahapon, si Ochoa nga kadtong anaa sa criminal justice system kinahanglan maningkamot aron motugma sa mga plano ug programa ni Presidente Benigno Aquino III ug sa iyang mga economic managers aron modani ug mga investors.
“Sa kinatibuk-an, ang mensahe nga angay natong ipaabot ngadto sa international community simple lamang: Bukas ang atong ganghaan alang sa negosyo, apan serado kini alang sa krimen,” si Ochoa nagkanayon.
Gihatagan ug kamahinungdanon ni Ochoa ang panginahanglan aron ang Pilipinas mahimong usa ka nasod diin mopatigbabaw ang hustisya ug balaod ug mahimong madanihon ang Pilipinas ngadto sa mga negosyante nga mopasulod ug puhunan ingon man mohatag ug panarbaho alang sa katawhang Pilipino.
Siya miingon nga ang executive department nagpadayon pagpanday ug mga polisiya ug lakang aron pagdani sa mga foreign investors nga mamuhunan sa nasod.
“Samtang trabaho nila ang pag-awhag sa mga foreign investors nga mobubo sa ilang puhunan dinhi sa nasod, trabaho usab niadtong anaa sa law enforcement sama sa DOJ ug NPS nga santaon ang international crime syndicates nga nagalihok ug nangbiktima sa aong katawhan,”pulong ni Ochoa.
“Alang niadtong mga lehitimong negosyante nga buot mamuhunan dinhi ug buot modawat sa ginansiya sa ilang puhunan, amo kamong gidasig ug himoong hayahay ug sayon ang kinabuhi alang kaninyo; sa mga criminal nga gusong mokita pinaagi sa illegal nga paagi, lisod-lisoron namo sila ug gamiton ang tanang resources sa nasod aron sila madakpan, makasohan ug masilotan sa krimen nga ilang nabuhat,” panapos nga pahayag ni Ochoa. (ALT-PIA9/Zambo Sur)
