ni Alfonso T. Ruda
DIPOLOG CITY, MARCH 31(PIA)---Gipasalig sa Malakanyang nga duna pa gihapoy hingpit nga pagsalig si Presidente Benigno Aquino III sa Philippine National Police taliwala sa nagpanghitabong krimen niining ulahing mga adlaw uban ang pag-ingon nga miubos ang gidaghanon sa nahitabong krimen sa nasod.
Sa iyang pag-atubang sa mga tigbalita sa palasyo, gipahayag ni Presidential spokesperson Edwin Lacierda, nga bug-os pa gihapon ang pagsalig ni Presidente Aquino kang PNP Chief Director-General Nicanor Bartolome ug sa kinatibuk-ang liderato sa PNP.
Gibutyag usab ni Lacierda nga base sa record sa PNP ug sa Department of Interior and Local Government (DILG), miubos ang gidaghanon sa krimen nga nahitabo sa nasod.
Midugang pa ang opisyal, nga na-highlight lang ang mga high-profiled cases sa mga balita maoy hinungdan nga nakamugna kini ug dakong epekto sa katawhan.
“Ang matuod nga sitwasyon nga miubos ang crime rate… base sa istatistika, miubos ang crime rate u gang problema lang kay na-highlight ang mga high-profiled sa media, apan kon tan-awon ang record sa PNP ug DILG, ang istatistika sa index crimes miubos sa tuig-sa-tuig nga basehan ug mao kana ang basehan sa pahayag kon nganong kanunay namong bibalik-balik nga miubos ang insidente sa krimen,” matod pa ni Lacierda.(ATR/PCOO/PIA9-Zambo Norte)
