ni Alfonso T. Ruda
DIPOLOG CITY, MARCH 31PIA)--- Gi-awhag karon sa Malakanyang ang tanan nga mosalmot ug mahimong tipik sa kalibutanong pagpaningkamot nga makuhaan ang epekto sa kausaban sa klima pinaagi sa pagpalong sa ilang sugang dagitab sulod sa usa ka takna.
Uban niini, nanawagan usab ang Malakanyang sa padayong pagpadas-og sa mga programang magkonserbar ug manalipod sa atong palibot.
Ang panawagan gipalanog sa tigpamaba sa Malakanyang nga si Edwin Lacierda sa gipahigayong press briefing dungan sa pagsaulog sa Earth Hour-usa ka kalibutanong kalihokan nga nagtumong pagsalbar sa atong palibot ug kinaiyahan.
Alang karong tuiga, tumong sa nasod nga malabwan ang record-breaking participation niini sa Earth Hour sa miaging tuig, usa ka world-wide power-off campaign nga nagtumong nga makuhaan ang epekto sa kausaban sa klima.
Kini pagahimoon gikan alas 8:30 ngadto sa alas 9:30 ang takna sa kagabhion karong gabii.
Ang Earth Hour nag-inusarang gisugdan sa siyudad sa Sydney, Australia niadtong 2007 ug nahimong kalibutanong kalihokan pagka-2008.
Sukad niadto, ang kalihokan gisalmotan na sa 1.8 ka bilyon ka mga tawo gikan sa 135 ka mga nasod.
Atol sa ika-lima ka tuig nga pagsalmot sa nasod sa Earth Hour, gibana-banang nakadaginot kini ug gikan 500 ngadto sa 600 ka megawatt nga kuryente.
Niadtong 2011, ang Earth Hour Philippines nga nagsugod sa kampanya ug naghimo sa selebrasyon sa Earth Hour ug kapin sa usa ka oras nagdasig sa katawhan nga ipadayon ang pagpaningkamot nga mahimong tibuok-tuig na kining kalihokan.
Nagkalain-laing programa nga nagtumong paghatag ug edukasyon sa ang gipasiugdahan aron pagsabwag ug impormasyon may kalabutan sa epekto sa kausaban sa klima.
Sukwahi sa nahimong kalihokan sa miaging tuig diin ang tanang kalihokan gipahigayon lamang sa Metro Manila, ang Earth Hour karong tuiga pagahimoon na pinaagi sa simultaneous switch-off ceremonies sa dakbayan sa Cebu, Davao ug Makati.(ATR/PCOO/PIA9-Zambo Norte)
