Ni Alma L. Tingcang
PAGADIAN CITY, March 27 - - - Gipasalig sa Malacanang ang panaad sa kagamhanang Aquino nga masumpo ang pagkuyanap sa kasong Acquired Immune Deficiency Syndrome sa nasod pinaagi sa epektibong information dissemination programs aron pag-edukar sa katawhan kabahin sa mga pamaagi aron malikayan ug dili matakboyan sa Human Immunodeficiency Virus (HIV) nga maoy hinungdan sa gikahadlokang sakit.
Si Presidential Spokesperson Edwin Lacierda miingon nga ang Department of Health nagpabiling nagtutok sa implementasyon sa mga programa ug impormasyon aron pagtudlo sa mga kamatuoran kalabot ning makamatay nga impeksiyon ug mga paagi aron mapanalipdan sila sa maong sakit.
Giila usab ni Lacierda ang kamahinungdananon sa paghimo’g desisyon alang niadtong nagbuhat sa mga kalihokan nga naghulga sa pagtakod sa maong sakit.
“Gihatagan ug kamahinungdanon sa Department of Health nga mapaneguro gayud nga ginabuhat ang mga preventive measures aron masumpo ang AIDS apan usa kini ka sosyal…usa ka personal nga desisyon alang niadtong anaa sa maong panarbaho…nagpadayon kita sa atong information education aron pagsumpo sa HIV-AIDS sa nasod,” si Lacierda miingon.
“Nakulbaan kami niini, busa gihangyo namo si Health Secretary Enrique T. Ona nga mapanegurong palapdan pa ang pagpahigayon ug pagsabwag sa impormasyon aron masanta kini,” pulong ni Lacierda.
Adunay gikataho nga usa ka 41 anyos nga lalaki nga namatay tungod sa AIDS niadtong nakalabay nga bulan ug gikumpirma kini sa health department.
Dugang pang taho sa DOH nga adunay 274 bag-o pa lamang nakumpirmang kaso sa HIV sa nasod sa nakalabay nga bulan, ang kinatas-ang natala sa Philippine HIV and AIDS registry.
Ang maong numero mas taas ug 72 porsiyento kaysa natala sa susamang panahon sa nakalabay nga tuig diin adunay 159 kaso sa Pebrero 2011. Ang maong taho nagpakita nga adunay 235 kaso nga mitakod pinaagi sa sexual contact diin 87% ang mga lalaki nga nakighilawas sa lalaki usab nga maoy kasagarang hinungdan sa pagtakboy.
Gawas sa pakighilawas, ang HIV motakod usab pinaagi sa blood transfusion, mga kontaminadong hypodermic needles ug pagbayloay sa inahan ug anak, pagpanganak ug breastfeeding. (ALT-PIA9/Zambo Sur)
