ni Alfonso T. Ruda
DIPOLOG CITY, MARCH 20(PIA)--- Ang Malakanyang namahayag nga ang pagsaka sa koleksyon sa buhis sa gobyerno ug 14.19 porsiento nga wala magpatuman ug mga bag-ong buhis maoy laing testimonya sa epektibong pagpaningkamot sa gobyerno nga mapalambo ang koleksyon sa buhis.
“Ang implementasyon sa mga programa sa pagpamuhis nga gipatuman sa Bureau of Internal Revenue nakapasaka sa aktwal nga koleksyon sa buhis ug 10.58 bilyones ka pesos ngadto sa 85.15 bilyones ka pesos niadtong Enero 2012 gikan sa 74.57 bilyones ka pesos sa susamang bulan sa miaging tuig,” matod pa sa tigpamaba sa Malakanyang nga si Edwin Lacierda.
Sa bulan sa Enero niining tuiga, matod pa sa BIR, nakakolekta sila ug 85.15 bilyones ka pesos nga buhis – 80.69 bilyones ka pesos gikan sa BIR operations ug 4.46 bilyones ka pesos gikan sa BIR non-operations.
Kumparar sa koleksyon sa BIR niadtong Enero 2011diin nakakolekta ang BIR ug 74.57 bilyones ka pesos nga buhis, ang aktwal nga koleksyon sa buhis karong tuiga, misaka ug 10.58 bilyones ka pesos kon 14.19 porsiento nga pagsaka sa koleksyon.
Subling gihatagan ug punto sa administrasyong Aquino nga dili sa pagpatuman ug bag-ong buhis, kundili pagtutok kon unsaon nga mapalambo ang pagpangolekta ug buhis sa Bureau of Internal Revenue ug Bureau of Customs. (ATR/PCOO/PIA9-Zambo Norte)
