ni Alfonso T. Ruda
DIPOLOG CITY, JAN. 17(PIA)---- Ang kuwarta nga napadala sa mga Filipino nga nagtrabaho sa gawas sa nasod niadtong bulan sa Nobyembre mao ang pinakadako sa tuig 2011, diin sa maong bulan, natala usab ang ikaduhang labing dakong pagsaka sa remittance karong nga miabot ug 10.6 porsiento ug nagdala sa tuig-sa-tuig nga pagsaka sa labing unang higayon sulod sa 11 ka bulan ngadto sa 7.3 porsiento.
Ang data nga nakuha gikan sa Bangko Sentral ng Pilipinas nagpakita nga ang remittance sa bulan sa Nobyembre miabot ug US$1.78 bilyones, mas taas ug US$1.6 bilyones kay sa natala sa usang tuig, samtang ang remittance sa bulan sa Nobyembre miabot ug US$18.32 bilyones kumpara sa US$17.1 bilyones nga OFW remittance niadtong Nobyembre 2010.
“Ang double-digit nga tubo sa OFW remittance sa bulan sa Nobyembre mahimong nagumikan sa dugang pondo nga gipadala sa mga Filipino sa gawas sa nasod ngadto sa ilang pamilya aron gastuhon panahon sa Pasko,” matod pa ni BSP Governor Armando Tetangco, Jr.
Sumala pa sa Hepe sa BSP, ang remittance gikan sa mga trabahante nga nakabase sa yuta ug dagat parehong misaka, diin ang nauna misaka ug 9.3 porsiento samtang ang naulahi misaka usab ug 15.8 porsiento, tuig-sa-tuig.
Matod pa ni Tetangco, ang mga land-based workers nakapadala ug kinatibuk-ang US$1.4 bilyones niadtong bulan sa Nobyembre 2011, samtang ang remittance gikan sa sea-based workers miabot usab ngadto sa US$377.7 milyones.
Ang pinakadakong bulto sa remittance sa unang 11 ka bulan sa miaging tuig nagagikan sa Estados Unidos, Canada, Saudi Arabia, United Kingdom, Japan, United Arab Emirates, Singapore, Italy, Germany ug Norway.
Kinuha ang mga numero gikan sa Philippine Overseas Employment Administration, si Tetangco miingon nga ang gidaghanon sa mga OFWs nga dunay mga kontrata ug nagpaabot nga ipadala sa gawas sa nasod misaka ug 4.5 porsiento ngadto sa 1,370,854 sa unang 9 ka bulan sa miaging tuig kon itandi sa 1,311,437 sa susamang panahon sa tuig 2010.
Midugang pa si Tetangco, nga gitaho usab sa POEA ang pag-aprobar sa 711,238 ka mga job orders niadtong 2011, diin 40 porsiento niini gilangkuban sa processed job orders alang sa serbisyo, produksyon, ingon man mga professional, technical, ug uban pang susamang trabaho.
Ang kinabag-an sa mga job orders para sa nasod sa Saudi Arabia, UAE, Qatar, Kuwait, Hongkong ug Taiwan.
Matod pa ni Tetangco, ang dakong remittance nga gipaagi sa pormal nga channel, nagumikan sa maayong koneksyon tali sa mga bangko dinhi sa Pilipinas uban sa ilang mga counter-part didto sa gawas sa nasod.(ATR/PIA9-Zambo Norte)
