AFP mipasalig padayun ang kabag-ohan sa liderato sa armadong kusog

ni Franklin P. Gumapon

DIPOLOG CITY, Jan. 17 (PIA) - - Magpadayon ang kausaban sa liderato sa armadong kusog sa Pilipinas taliwala sa panahon sa mga pagsuway.

Mao kini ang pamahayag nga gipagawas karong bag-o sa maong buhatan human gi-aprubahan sa Malacañang ang pagkatudlo sa duha ka heneral ug usa ka senior officer ngadto sa mga mahinungdanong position sa armadong kusog.

Si Major General Romulo M. Bambao molingkod isip kumander sa Special Operations Command sa Philippine Army (PA) gikan sa 2^nd Infantry “Jungle Fighter” Division (ID), PA sa Tanay, Rizal.

Nakatapos sa Philippine Military Academy (PMA) niadtong tuig 1979, si Bambao nakahimo sa paghupot sa mga mahinungdanong posisyon sa PA sama sa pagka-commanding officer sa 34^th Military Intelligence Company, 1ID, PA; commanding officer sa 16^th Infantry Battalion (IB) 2ID, PA; Chief of Staff sa Southern Luzon Command, AFP ug chief of staff, National Capitan Region Command, AFP.

Mopuli ni Bambao isip hepe sa 2^nd Infantry Division, PA, mao si Major General Eduardo D. Del Rosario.

Si Del Rosario nga sakop sa “Mapitagan” class sa PMA niadtong 1980 mao ang kasamtangang kumander sa Civil Relations Service (CRS) sa armadong kusog. Sa wala pa siya naghupot sa maong posisyon, miaagi si Del Rosario isip Army Internal Auditor ug kumander sa 1003rd Brigade, 10^th Infantry Division sa Philippine Army.

Si Col. Donato San Juan molingkod isip kumander sa Special Forces Regiment (Airborne), PA. Siya sakop sa “Maharlika” class sa PMA niadtong 1984.

Matud pa ni AFP chief of staff Jessie D. Dellosa nga sila sa armadong kusog ahente sa kalinaw alang sa kalambo-an sa nasud. Arun maka-ot ang maong tinguha, kinahanglan ipatuman ang mga kausaban ug kabag-ohan sa han-ay sa armadiong kusog, pasabot ni Dellosa. (FPG/PIA-Zamboanga del Norte)